Богов: На повидок големо прегрупирање во македонскиот банкарски сектор

Добивај вести на Viber

Гувернерот на НБРМ Димитар Богов најави прегрупирања на македонската банкарска сцена. Тој во интервју за телевизијата 24 Вести вели дека очекува окрупнување на македонскиот банкарски сектор, без да прецизира за кои имиња станува збор. „Ќе има спојувања и преземања меѓу постоечките банки“, изјави Богов, не исклучувајќи ја можноста за појавување и на некое име од надвор, кое како што рече тој, сепак не е од најзвучните светски имиња. Според Богов многу е поверојатна опцијата за внатрешни окрупнувања на банкарската сцена. Разбирливо неговата позиција не дозволува да се открие повеќе се додека сопствениците на самите банки не навестат за што поточно станува збор. Поместувања ги навести Бишев Дека банкарскиот сектор во земјава го очекуваат големи поместувања, претходно, практично најави дотогашниот директор на Стопанска Банка Скопје, Глигор Бишев, која е во тројката најголeми македонски банки, заедно со Комерцијална Банка и Тутунска Банка. Бишев, за многумина неочекувано, замина за прв човек на Шпаркасе Банка, поради што сега многумина сметаат дека токму од оваа банка ќе се покренат идните случувања во банкарскиот сектор, кои можат да завршат со спојување, окрупнување или пак преземања на некои од постоечките банки во земјава. Во Македонија во моментов егзистираат 16 банки, при што за некои медиумите постојано шпекулираа дека се на продажба, но во практиката во последниве две години немаше големи поместувања. Најголем дел од нив се или доминантно со странски капитал, или пак во акционерската структура имаат некоја од меѓународните финансиски институции. Од трите најголеми банки, две се во сопственост на странски банкарски групации. Инаку, дел од банките дојдоа во сложена ситуација во последниве месеци откако нивните домицилни банки се соочија со потешкотии, но нивното редовно и успешно работење во Македонија никогаш не беше доведено во прашање.