Богов: податоците за јавниот долг се точни, не знам како Гошев дошол до 45%!

Добивај вести на Viber

Податокот на министерството за финансии за јавниот долг од 30, 2 % од БДП  е точен, и е целосно споредлив со податоците на Еуростат, изјави денеска Гувернерот Димитар Богов, откако пред неколку дена поранешниот гувернер Петар Гошев рече дека долгот на државата надминува 45% од БДП, и не е 30% како што прикажува Министерството за финансии. - Во нашите мерења за долгот не е вклучен единствено долгот на општините, но тие досега не се задолжуваа и јас незнам како господинот Гошев дошол до оваа пресметка од 45 % јавен долг од БДП, изјави за Сител гувернерот Богов. Гувернерот смета дека во бројките за јавниот долг не треба да влезат обврските на Централната Банка, благајничките записи, оти тие не се долг на државата. Гошев на неодамнешната дебата рече дека вкупниот јавен долг ја надминува бројката 45 % од БДП, доколку во мерењата би се вклучиле долговите на монетарната власт, јавните фондови, на општините, на градот,  на јавните претпријатија. Со сличен став излезе и академик Абдулменаф Беџети, според кого објавувањето само на јавниот долг на централната влада, (кој е помал од вкупниот јавен долг) без останатите институции е само поради политички интерес.