„Бомба“ откри како Мијалков регрутирал гласачи и со чија помош

Добивај вести на Viber

„Бомба“ која се слушна денеска во судот покажува како се лобирало и агитирало за гласови. Претходната власт преку институции, јавни претпријатија, преку одредени етнички заедници „притискала“ за што повеќе гласови. 

Поранешниот министер за транспорт и врски, Миле Јанакиески, во една од „бомбите“ кои денеска беа емитувани во судница на рочиштето по предметот „Титаник“ вели дека завршил 12 институции за обезбедување на гласови. 

Гласот на екс директорот на УБК, Сашо Мијалков, се појавува во еден разговор, и  му вели на Јанакиески дека не треба да зборуваат по телефон затоа што не се знае кој може да ги прислушува.

Мијалков му кажува дека успеал преку Мендух Тачи и Али Ахмети да обезбеди 800 гласа во корист на кандидатот на ВМРО-ДПМНЕ. Вели ги стегнал Албанците и Ромите. 

„Бев со Тачи и со Адеми, ги наговорив сите нивни да излезат. Договорив со нив за секоја куќа да има по еден човек да ги носи на гласање. 400 да даде ДУИ, 400 Тачи и уште 700 ваму, ете ти ги 1.500‘“, објаснува Мијалков. 

Овој разговор е реализиран на 29 март 2013 година. Се наведува и дека со автомобили луѓето ќе треба да се однесат на гласање. 

Советничката на ВМРО-ДПМНЕ во Град Скопје, Ирена Мишева, кога вели дека ќе притисне до максимум и преку директорите на јавните претпријатија.

Поранешната министерка за култура, Елизабета Канческа-Милевска, се сложила по барање на Јанакиески да регрутираат за гласање уметниците од театрите, балетот и операта.

„Титаник“ за изборни манипулации е првиот случај на СЈО отворен во 2016 година. 

Откако СЈО го обелодени овој случај, се доведоа во прашање изборните резултати, поради начинот на кој се вршело притисок врз гласачи.