Бошњаците навредени од изјавите на Чилиманов дека Бишевац е бегалец

Добивај вести на Viber

Здруженијата на Бошњаците во Македонија соопштија дека се навредени од изјавите на новинарот Цветин Чилиманов кој дрско му се обрати на Сафет Бишевац за време на емисијата „24 Анализа“ емитувана на 24 Вести од пред речиси две недели.

- Од страна на Чилиманов беше кажана следнава реченица: „Сафет ти си бегалец, од некоја земја дојден тука, си добил државјанство“. Ние како Бошњаци во Р.Македонија остро го осудуваме овој говор на омраза, со кој гостинот се обидува да го навреди Бишевац, како и народот на која му припаѓа, нарекувајќи го бегалец, а со тоа и останати Бошњаци во државата, кои сме дошле од некаде.

Иако некој ќе помисли дека Цветан Чилиманов воопшто не ја познава историјата на Бошњаците и поради тоа ја кажал горецитираната реченица, сепак, зборот кој го користи „бегалец“ е збор кој не е понижувачки по дефиниција, но значи подредена состојба во системот во кој истиот припаѓа и поради тоа треба да биде во подредена улога. Бошњаците во Македонија според Уставот се конститутивен народ на нашата заедничка држава, кој со векови живее во Македонија, заедно учестувал и има свој значаен придонес во градењето на ова држава. На Бошњаците не им било дадено државјанство од сомилиост, туку, затоа што им следува според сите критериуми за да се здобијат со државјанството на независна Република Македонија, реагираат од здруженијата.

- Јавно ја повикуваме ВМРО-ДПМНЕ, чиј предлог е Цветин Чилиманов во ад-хок телото за медиуми, да се произнесе дали ги споделува ставовите за Бошњаците на Чилиманов. Доколку не, исто така јасно и гласно да се оградат од овој негов испад.

Го повикуваме Цветин Чилиманов јавно да им се извини на Бошњаците. Ве повикуваме и Вас, како и целата демократска јавност, јавно да го осудите овој говор на омраза, се вели во реакцијата потпишана од НВО Еду Ниса, ШАДРВАН Македонија, НВО Глас Оризара, Сенад Смаиловиќ, Џелал Хоџиќ, Елза Бачевац, Елдиса Тртовац, Емина Реброња, Асмир Алиспахич и од Рахман Календер.