Божиновски: Бегството на Груевски носи непроценлива штета по сите процеси во државата

Добивај вести на Viber

Обвинетиот поранешен генерален секретар на Владата, Кирил Божиновски денеска пред судот даде збор дека нема да бега. 

Тој го осуди бегството на поранешниот премиер, Никола Груевски и рече дека со тоа предизвикал непоправлива штета.

„Најостро го осудувам ваквиот чекор, кој носи непроценлива штета по сите процеси во државата. Но, не може со нечие поведение да се прави паралела со друг обвинет. Секој си носи последици за своите постапки“ – додаде Божиновски.

Тој денеска пред Апелациониот суд изјави дека со eкс премиерот, Миле Јанакиески се сретнал еден ден пред да бидат приведени и однесени во притвор, но дека не разговарале за никакво бегство.

„Со Јанакиески остварив случајна и неформална средба на јавно место, во присуство на сведоци и ми кажа дека разговарал со претседателот за актуелни случувања, но во ниту еден момент не ми кажа дека се разговарало за она што е причина за овој притвор. Вечерта пред моето приведување бев во својот дом и се подготував за утрешното рочиште на Титаник“ – рече Божиновски.

Како аргумент за да му се укине притворот тој вели дека е татко на две малолетни деца и дека има сопруга со нарушено здравје. Кажа дека не е точно дека има банкарски сметки во друга земја.

Адвокатите потенцираа дека решенијата за притворите на Божиновски и Миле Јанакиески се копи-пејст со исти аргументи, само имињата се различни.

Апелацискиот суд има рок од 48 часа да донесе одлука по жалбите за мерката притвор.