Бришела анти-албански графити и добила казна од МВР
Објавено во: Македонија 08 Август, 2019
Анти-албанските графити со говор на омраза како „Смрт за ш.....и“ и слични ги бришела на стамбените згради и ги заменувала со мирољубиви пораки, но добила казна од МВР за узурпација на просторот. Во реакција на својот Фејсбук, Гордана Пирковска Змијанац вели дека побарала помош од полициската станица Ѓорче Петров, но наместо да ја поддржат, тие ја осудиле дека допишувала зборови.
Во документот што го прими се наведува дека постои повреда на регулативата со која се уредува однесувањето со употребата на јавни згради и други објекти и казната за тоа е од 100 до 400 евра. Таа вели дека имала идеја да испрати мирољубива порака, надевајќи се дека правдата ќе победи и дека МВР ќе ја повлече прекршочната пријава.
„Не можам да ја опишам мојата вчудоневиденост кога утрово бев известена дека против мене е поведена прекршочна постапка поради ,,...оневозможување за користење или оштетување на јавни згради, јавни чешми, извори, плажи, паркови или други јавни објекти и инсталации.“ Понатака се вели дека ,,на наведената дата, време и место, со спреј, на ѕидот од зградата сум испишувала графити со содржина ,,смрт за омразата, љубов за сите“, што не е во потполност точно туку на претходно напишаната порака со говор на омраза: ,,смрт на шиптарите“, го избришав зборот ,,шиптарите“ а допишав: ,,омразата“ и ,,љубов за сите“. Зошто во известувањето не е наведено дека јас сум избришала говор на омраза и на местото со навредувачка содржина сум допишала мирољубива порака?“, вели таа во дел од својот статус.