Британија: Европа катастрофално ја протолкува Русија

Добивај вести на Viber

Британската влада и европските дипломати без потребно знаење влегоа во украинската криза и катастрофално лошо го протолкуваа расположението во Европа пред судирите со Русија, се наведува во извештајот на Одборот за ЕУ на Домот на лордовите на британскиот парламент.

Во извештајот се наведува дека министрите за надворешни работи на Велика Британија и другите членки на ЕУ биле лошо подготвени за „авторитативен одговор“ на кризата, а дел и поради отсуството на експертско познавање за Русија.

„Британската Влада не била активна или видлива по тоа прашање колку што можела“ се наведува во извештајот.

Британското министерство за надворешни работи соопштило дека никој не можел да го предвиде обемот на „неоправдлива и илегална“ руска интервенција на истокот од Украина и дека одлуката е на украинскиот народ дали сака поблиски врски со Европската унија.

Членовите на Одборот за Европска унија на Домот на лордови наведуваат дека Европската унија предолго била оптимистична по повод демократскиот развој на Русија, поради што не успеала да ја сфати длабочината на руското непријателство кога почнала разговори за Укрина во 2013 година.

Поранешниот британски командант во НАТО Ричард Ширеф во почетокот на овој месец рекол дека премиерот Дејвид Камерон поради недејствувањето на прашањето за Украина е „надворешно-политички неважен“.