БРИТАНСКАТА ФУНТА ДОСТИГНА НАЈНИСКО НИВО ВО ПОСЛЕДНИТЕ 37 ГОДИНИ: Економистите предвидуваат да падне на 1,10 долари

Добивај вести на Viber

Британската фунта денеска падна на најниско ниво во последните 37 години, откако новите податоци покажаа дека купувачите ги намалуваат трошоците бидејќи инфлацијата ги оптоварува буџетите на домаќинствата, јавува CNN.

Валутата падна под 1,14 долари, што е најниско ниво од 1985 година. Канцеларијата за национална статистика соопшти дека продажбата на мало паднала за 1,6 отсто месечно во август, што е најголем пад од декември 2021 година. Во исто време, тоа е значително полошо отколку што очекуваа економистите.

„Мислам дека Велика Британија е веќе во рецесија“, рече Мајкл Хјусон, главен пазарен аналитичар во CMC Markets UK.

Фунтата беше погодена од низа слаби економски податоци, но и од наглиот раст на американскиот долар. Валутата сега е блиску до најсилното ниво во последните две децении во однос на другите, поттикнати од очекувањата дека Федералните резерви ќе ги зголемат стапките следната недела.

Но, економската перспектива на Британија значи дека фунтата страда повеќе од повеќето. Годинава изгуби повеќе од 15 отсто од вредноста во однос на доларот, во споредба со падот на еврото од 12 отсто.

Планот на премиерката Лиз Трас за субвенционирање на сметките за енергија за домаќинствата и бизнисите може да ја ублажи болката оваа зима, но можеби нема да биде доволно за да се врати растот.

Банката на Англија предвиде продолжена рецесија пред да биде објавен планот.

Инвеститорите, исто така, беа вознемирени од индициите дека владата ќе плати за нејзината енергетска програма, која може да чини дури 150 милијарди фунти (171 милијарди долари), со нагло зголемување на националниот долг на Британија. Повеќе детали на оваа тема се очекуваат следниот петок.

Друг проблем е што Британија увезува повеќе отколку што извезува. Тоа значи дека послабата фунта ја зголемува цената на горивото, храната и другите стоки, што уште повеќе го отежнува Банката на Англија да ги држи цените под контрола. Централната банка, која во четврток треба да ја објави својата најнова политика, агресивно ги зголемува каматните стапки во решителен обид да ја намали инфлацијата, која во август изнесуваше 9,9 отсто, а само еден месец претходно го достигна својот максимум во последните 40 години од 10,1 отсто. Сега Британија се соочува со огромна дилема: уште едно големо зголемување на трошоците за позајмување може дополнително да ја оптовари економијата, додека забавувањето од ФЕД може да ја турне валутата уште пониско.

Хјусон рече дека верува оти фунтата сега ќе падне на 1,10 долари откако ќе ја пробие границата од 1,14 долари.