Брзи тестови и во Кочани, Кавадарци, Велес, Куманово - сепак, закажување само преку матичен

Добивај вести на Viber

Министерството за здравство информира дека од вчера започнало тестирањето со брзи антигенски тестови во општите болници во Кочани и Кавадарци, и во здравствените домови во Велес и Куманово. 

Денеска, пак, со брзи тестови почнуваат и здравствените домови во Битола и Делчево, а Центарот за јавно здравје Битола од понеделник, 30 ноември.

Во овие јавно-здравствени установи, во петокот на 20 ноември беше спроведена обука на тимовите кои ќе го спроведуваат тестирањето со овие тестови.

„И во другите региони, следствено, во моментов се одржуваат обуки на кадар и испитувања на условите потребни за отпочнување на тестирање“, велат од Здравство.

Досега, на девет локации во Република Северна Македонија, вклучително и градот Скопје се врши тестирање со брзи антигенски тестови. Минатата недела, почна тестирањето во Здравствените домови во Штип, Гостивар, Прилеп, Струмица и Општата болница во Кичево.

„Во однос за закажувањето, брз тест може да закаже единствено матичен лекар и тоа доколку пациентот го исполнува алгоритмот, односно има симптоми на вирусот КОВИД-19, не повеќе од 5 дена. Алгоритмот за брзо тестирање е од Светската здравствена организација, а матичниот лекар по земената анамнеза на пациентот одлучува дали истиот ќе се тетсира со ПЦР тест или антигенски - брз тест. Тестирањето со брзите антигенски тестови е бесплатно за граѓаните“, објаснуваат здравствените власти.