Бучим оствари 10 милиони долари само во октомври

Добивај вести на Viber

Радовишкиот рудник за бакар и злато, Бучим, работи во полна пареа. Само во октомври оствари 10 милиони долари од продажба на бакарниот концентрат. -Само во октомври имаме двојно поголема реализација во споредба со претходниот период. Ова е резултат на зголемениот извоз на катоден бакар. Стабилната цена на бакарот од 8.000 долари за тон ни помогна да ги оствариме овие резултати“, вели за “Фактор“ заменикот генерален директор на Бучим, Николајчо Николов. Тој додава дека кон крајот на следниот месец треба да ги имаат и конечните резултати за рудните потенцијали на локалитетот Кадиица кај Пехчево. Според досегашните прогнози од истражувањата, Кадиица најверојатно лежи на повеќе од 100 милиони тони бакарна руда. -Бакарната руда од Кадиица е оксидна, што значи дека за нејзината преработка не е потребна флотација. Ќе ја преработуваме на самото место, односно ќе ја раствораме рудната резерва под земја за да добиеме течност богата со бакар. Очекуваме дека Кадиица ќе го продолжи континуитетот на Бучим во периодот 2019-2030 година. Се работи за инвестиција од неколку стотини милиони евра, секако доколку истражувањето ги даде очекуваните рудни резерви“, објаснува Николов. Од неодамна Бучим ги истражува рудните резерви и кај локалитетот Боров Дол, кај Радовиш. Боров Дол е богат со сулфиден бакар, руда каква што сега се ископува од Бучим. Според досегашните најави, од Бучим планираат ископаниот бакар од Боров Дол во иднина со транспортни ленти да го носат до Бучим.