БУМ ПРЕКУ ЛЕТО: Иселениците си доаѓаат дома, а колку бракови се склучуваат во просек?
Објавено во: Македонија 08 Август, 2019
Во текот на летните месеци се склучуваат повеќе бракови во однос на остатокот од годината.
Ваквата состојба е резултат на тоа што луѓето кои се во странство, се враќаат дома и се венчаваат во своите општини. Јуни, јули, август и септември се месеци со најмногу склучени бракови. Бракови се склучуваат претежно во северозападниот дел на државата.
„Во летниот период зголемен е бројот на склучување на бракови, но не само од иселениците, туку воопшто. Најмногу има во Скопје. Куманово, Тетово, Битола, Гостивар, Кичево и некои други градови. Во просек во овој период се склучуваат по 550 бракови во целата држава на месечно ниво. Ударни месеци за склучување на бракови се мај, јуни, јули, август, и септември“, велат од Управата за водење на матични книги.
Угостителите се задоволни затоа што преку лето имаат полни раце работа, многу свадби и веселби токму поради луѓето кои живеат и работат во странство, а преку лето доаѓаат во татковината.
„Имам многу работа овој период, а свадби може да се прават скоро секој ден, без разлика дали е петок, сабота, недела. Доаѓаат иселениците од Швајцарија, Германија, се венчаваат и си заминуваат. Секоја година се случува истото преку лето“, велат од ресторан во Гостивар.
Слично е и на истокот од земјата. Сепак, угостителите велат дека за разлика од порано сега бројот на венчавки во лето е намален.
„Има, но не е како што беше порано, но можам да кажам се случува во текот на еден ден некогаш да има дури 2-3 венчавки во градот. Доаѓаат иселениците кои се во Швајцарија, Германија, Англија. Забележувам дека помалку трошат по ресторани за разлика од порано, очигледно парите повеќе сакаат да ги трошат дома. Свадби се закажуваат без разлика дали е викенд или работен ден“, велат од делчевски ресторан.
Според податоците на Државниот завод за статистика, бројот на склучените бракови во 2018 година, изнесува 13.494 склучени бракoви. Најмногу бракови, 1.665 или 12.3 % се склучени во месец август, а најмалку, 738 или 5.5 % во месец март. Исто било и една година претходно. Во 2017 година најмногу бракови, 1.771 или 12.9 %, се склучени во месец август, а најмалку во месец март, 764 или 5.5 %.
Сања Атанасовска