Д-р. Костов и д-р, Стевановиќ: Дебелината или обезитас, најсериозен коморбидитет и главна причина за смртност кај младите од ковид

Добивај вести на Viber

Во неколку наврати до сега лекарите предупредуваат на коморбидитетите кај граѓаните, кои доколку се заразат со корона вирусот, се лекуваат многу подолго, а најголем процент од нив завршуваат фатално, односно со смртни последици.

Освен дијабетот, хорничните срцеви заболувања, хроничните белодробни заболувања, астма и ХОББ, болестите на бубрезите, лекарите како еден од најсериозните коморбидитети ја посочуваат прекумерната тежина или обезитас. И во текот на вчерашниот ден, директорката на Клиниката за инфективни болести, д-р. Милена Стевановиќ рече дека, најголемиот број од младите починати се токму поради таа здравствена состојба.

Неодамна во разговор за Фактор, д-р. Стевановиќ рече дека дебелите луѓе едноставно не може да имаат здраво срце, здрави бели дробови, здрави вени и артерии, и токму поради тоа многу потешко се изборуваат со болеста или воопшто и не може да го победат Ковид-19.

-Исхраната е крајно лоша, а сето тоа си го зема својот данок. Еден од главните фактори за смртност, независно од возраста на пациентите, е дебелината. На Инфективната клиника е хоспитализирано 12-годишно дете со прекумерна тежина и е во навистина сериозна состојба. Сакам да речам дека, луѓето со прекумерна тежина не може да имаат здраво срце, не може да имаат здрави крвни садови, и во тој случај организмот не може да се бори со многу болести, па еве сега и со корона вирусот, посочи д-р. Стевановиќ.

Истовремено и директорот на ГОБ „8 Септември“, д-р. Христијан Костов неколку пати досега има кажано дека во таа здравствена установа, која до септември беше главниот ковид-центар во земјава, најголемиот број од младите починати пациенти беа или со даунов синдром или со прекумерна тежина.

-Неколку пациенти на возраст од 35, 36 години кои боледуваа од ковид, а кои за жал не успеавме да ги спасиме, имаа прекумерна тежина. Тоа е навистина сериозна здравствена состојба, во која организмот не може да се избори со корона вирусот, вели д-р. Костов.