Дали администрацијата „доброволно“ ќе присуствува на неделниот митинг на ВМРО-ДПМНЕ?

Добивај вести на Viber

Владејачката партија, ВМРО-ДПМНЕ во недела (16. октомври) организира собир во спортскиот центар Борис Трајковски каде свое обраќање ќе има претседателот на партијата, Никола Груевски. Во социјалните медиуми веќе кружат фотографии од пораки, во кои им се наложува на административците задолжително да присуствуваат на неделниот настан.

„Се прават списоци во училишта, се ангажираат наставници и професори, им се наложува задолжително да присуствуваат на митингот во недела“, вели граѓанка од мало гратче во Источна Македонија, која инсистира на својата анонимност, исплашена за својата безбедност и работна иднина, пренесе ЦИВИЛ.

„Ќе се потпишуваат на список при влез во автобус, а потоа, кога ќе стигнат во салата’Борис Трајковски’, на списокот ќе треба да стават потпис, како потврда за нивното присуство. Кажано им е дека не смеат да отсуствуваат. На луѓето, иако се партиски членови, веќе им е здодеано да се јавуваат на сите митинзи, па наместо доброволно, од нив да се бара задолжително присуство“, вели граѓански новинар.

Александар Кирацовски, дополнителен заменски министер во МИОА, денеска предупреди дека такви списоци веќе се прават и дека се врши голем притисок на администрацијата за присуство на неделниот митинг на ВМРО-ДПМНЕ. 

- Список во кој има околу 2 илјади граѓани, на кои раководители и шефови – кадри на ВМРО-ДПМНЕ, имале намера да им ѕвонат и да бараат од нив да излезат на протести и контра протести и на избори како нивни сигурни гласачи. Тука има конкретни имиња, презимиња, адреси, избирачки места, телефонски броеви на луѓето. Но тука ги има и податоците на оние кои ги правеле овие списоци и се обидувале да влијаат, изјави денеска Кирацовски.

Партиските притисоци продолжуваат врз вработените во институциите, иако опозицијата предупредува постојано за оваа практика. Сите реформи кои ги договорија политичарите, треба да значат стопирање на досегашната практика на примена на политички мобинг врз вработените.