Автокампови: закон по мерка на Субрата Рој или конечно регулирање на една сфера?

Добивај вести на Viber

Владата носи Закон за автокампови во Македонија. Законот е во Собранието. Додека за пратенците од владејачката ВМРО ДМПНЕ со овој закон се регулира начинот за основањето автокамп, постапката за отуѓување на земјиште наменето за автокамп, како и условите кои треба да ги исполнат корисниците на автокамповите, за пратениците од опозциската СДСМ , ова е криминален закон бидејќи е предвидено дека автокамп е јавен интерес, што значи дека на граѓаните може да им се одзема приватен имот и потоа државата да го продава по едно евро. Дополнително опозцијата посочува и дека овој закон се носи заради барањата  на индиецот Субрата Рој . Наташа Стојановска Во предлог Законот за автокампови, пишува дека „Изградбата и изведувањето на работите за основање и работење на автокамп е од јавен интерес“. Ова предизвика бурни реакции во јавноста, бидејќи со прогласувањето на автокампот за јавен интерес, државата (согласно Законот за експропријација ) ќе може да одземе нечиј приватен имот заради изградба автокамп. Земјиштето на кое ќе се градат автокампови (сеедно дали е државно или одземено од приватни лица) ќе се продава по едно евро за квадратен метар. Опозицијата бара целосно повлекување на законот. Според нив, ова е криминален закон бидејќи, од една страна се распродава државниот имот за едно евро за квадратен метар а од друга страна и граѓаните директно може да бидат оштетени оти приватно земјиште ќе може да се одзема, за него да се градат автокампови. Дополнително, посочуваат од опозицијата сето ова се прави само за да му се удоволи на индиецот Субрата Рој. “Со изгласувањето на ваков закон слободно може да си ја честитаме 1945.Тогаш се одземаа имоти на граѓаните ама тогаш причината за одземањето на имотите навистина беше јавно добро, иако , подоцна сите држави се согласија дека национализацијата била грешка и дека луѓето треба да бидат обештетени.Сега, во 2012 година ќе се одземаат имоти на граѓаните како во 1945 , ама за какво јавно добро? Дали , индиецот Субрата Рој е јавно добро , прашува Митре Вељановски од опозициската СДСМ . Според него овој закон за автокамповите , таков како што е предложен е нарушување на Уставот и е злосторство против македонскиот народ . “Дали Македонија ќе дојде да ја спасува индиецот Субрата Рој, човекот за кого  весниците пишуваат дека затаил 4,5 милијарди долари? За него менуваме закони на штета на македонските граѓани, бидејќи тој сакал да прави автокампови во земјава и нацртал некакви фикс идеи на компјутер“, вели Вељановски За пратениците од владејачката ВМРО ДПМНЕ, пак овој Закон само ги прецизира начинот и условите под кои се дава автокампот. „Автокампот се основа на подрачје за кое е донесена урбанистичко-планска документација за автокамп или урбанистички план со кој е предвиден автокамп согласно Законот за просторно и урбанистичко планирање. Овие планови ги носат советници во општините во кои седат луѓе од сите политички партии и тие одлучуваат каде и што ќе се гради и на тој начин не може да се врши злоупотреба , изјави Лилјана Затуркова од ВМРО ДПМНЕ. Склучените договори ќе може да се менуваат со Анекси Дополнително е спорно и тоа што, откако земјиштето ќе се продаде на лицитација и ќе се склучи договор со купувачот, потоа тој договор може да се менува со Анекси. Според предлог Законот за автокапмпови, Анекси може да се прават во повеќе случаи и тоа ако има измена на урбанистичка планска документација, промена на број на катастарска парцела или промена на катастарска општина на земјиштето, статусна промена на корисникот на автокампот, отстранување на грешки во податоците за описот на земјиштето кое е отуѓено, но, и поради други непредвидени околности. За познавачите токму ова остава простор за огромни манипулации,односно откако на огласите ќе бидат наведени едни критериуми и услови подоцна во директна спогодба со купувачот тие да се променат, ставајќи ги во нерамноправна положба сите што учествувале на огласите и понудиле одредена сума за локацијата но под првично наведените услови. Сахаријан Македонија Субрата Рој најави дека во Љубаниште сака да гради луксзуен туристички центар. Таму веќе постои автокамп на површина од 10 хектари. Инвестицијата според првичните најави треба да чини 40 милиони евра. Веднаш по објавувањето на проектот, медиумите напишаа дека Субрата Рој ќе го гради Дубаи во Охрид. И, додека дел од граѓаните се воодушевуваа на луксузниот проект, а дел стравуваат за своите приватни локации, во јавноста се појави уште една дилема односно дали ќе има интервенција на вода, бидејќи во тој случај за проектот ќе треба да се изјаснат еколошките друштва, и посебно Билатералниот секретаријат за заштита на Охридското езеро.