ДЕН ЗА ОДЛУКА – Кој ќе го наследи Баросо?

Добивај вести на Viber

Лидерите на земјите-членки на Европската унија се очекува на денешниот состанок во Брисел да го изберат поранешниот премиер на Луксембург, Жан-Клод Јункер за нов претседател на Европската комисија. Сепак за неговиот избор не постои едногласност - Велика Британија остро се спротивставува Јункер да ја преземе важната функција во Европската унија. Британскиот премиер Дејвид Камерон му забележува на поранешниот луксембуршки премиер дека премногу се залага за јакнење на Унијата, што би можело да ги блокира натамошните реформи на ЕУ. Камерон смета дека Јункер е „погрешен човек во погрешно време“ и дека на Комисијата и е потребен претседател кој решително ќе тргне кон реформи. Според најавите, британскиот премиер е подготвен до последен момент да се бори против назначувањето, но во оваа битка по се изгледа ќе остане осамен. Јункер веќе ја доби поддршката на германската канцеларка Ангела Меркел, како и на осум лево ориентирани шефови на држави и влади од земјите-членки на Унијата: францускиот претседател Франсоа Оланд, австрискиот канцелар Вернер Фајман и премиерите на Романија, Италија, Белгија, Словачка, Чешка и Данска. Изборот на Јункер најавија дека ќе го поддржат и Шведска и Холандија. На оваа позиција, Јункер треба да го наследи досегашниот претседател Жозе Мануел Баросо. Според познавачите, во однос на проширувањето на Европската унија, Јункер во принцип го поддржува, но сепак смета дека во моментот приоритет е внатрешна стабилизација на Унијата.