ДЕВОЈКИ ДИСКРИМИНИРАНИ ЗА ВРАБОТУВАЊЕ: Ги прашуваат дали планираат да стапуваат во брак и да раѓаат деца

Добивај вести на Viber

На многу девојки на интервјуата за работа им било поставено прашањето дали планираат да стапуваат во брак и да раѓаат деца. Девојките се жалат на дискриминација. 

„Бев на интервју за работа како медицинска сестра и првото прашање кое ми го поставија беше дали сум мажена. Јас на тоа ги прашав како е тоа релевантно за работата која ја нудат. На тоа девојката која ме интервјуираше ми рече дека им е важно зашто сакаат да оформат постојан тим и дека доколку планирам деца во блиска иднина ќе бидам отсутна и тоа не им одговара. Јас им одговорив дека тоа е многу лично и дека немаат право да прашуваат и дека доколку сакаат да го дискутираат мојот долгорочен ангажман тоа е сосем нешто друго. На ова интервјуерката се збуни и не знаеше што да каже. Потоа интервјуто течеше нормално, по што ми рекоа дека ќе ми се јават доколку ме одберат, за што искрено се сомневам поради одговорот кој им го дадов“, ова е искуство на една млада девојка.

Но, оваа пракса трае со години. Со ваков проблем се соочиле младите девојки кои аплицирале за работа во приватни фирми.

„Toa се случи на ќерка ми и таа им одговори дека не може да го прифати работното место затоа што и поставуваат услови. Две години да не се мажи, и да не раѓа деца. Не го оправдувам тоа. Јас на 18 години се вработив, по година дена родив дете, и немаше никаков проблем, сѐ беше во ред, а денес не е така“, вели Слаѓана Јакимовска, граѓанка.

Жените го осудуваат ваквото однесување. Велат дека работата е важна, за да се обезбеди егзистенција, но семејството е на прво место.

„Тоа е чиста дискриминација. Мене некој да ме уценува дали ќе раѓам деца или не, да ми поставува услови и потоа да одлучи дали да ме вработи? Да бара од мене да сум мажена, да имам веќе родено деца или ако сум млада да ме прашува дали планирам деца? Порано не беше така. Јас со 18 години од школска клупа сум излегла и сум се вработила, и во таа фирма работев цел живот. Денес е многу лошо. За мојата снаа кога дознаа на работа дека е во четврти месец од бременоста, ја одјавија во фирмата, и додека беше дома потоа со бебе си остана без денар“, раскажува Лепосава М.

Од Хелсиншкиот комитет за човекови права велат дека во последниве две години немало претставка од припадничка на понежниот пол која се пожалила дека е дискриминирана на интервју за работа. Додаваат дека има дискриминација во самите огласи за вработување каде е наведено стриктно дека се бара работник или работничка. Дополнително, велат дека се случува жените да останат без работа додека се на породилно отсуство.