Димитриев: Eвропското решение за мигрантите пресудно за Македонија

Добивај вести на Viber

Премиерот за спроведување на изборите Емил Димитриев пред учеството на европскиот самит за бегалците посочи дека доколку Европската Унија донесе решение за бегалската криза тоа ќе биде пресудно за Македонија која и самата треба да се справува со предизвици на границата.

- Гледано ретроспективно што Република Македонија направи во справувањето со светската глобална тенденција за мигрирање на голем број на народи ние ќе го истакнеме на утрешниот Самит. Јас можам да кажам дека без разлика што Република Македонија е мала земја со ограничени ресурси, сепак одигра една од клучните улоги во справувањето со мигрантската криза и беше една од клучните земји на балканската рута на движење на мигрантите. Целата активност беше во содејство со инструкциите и во соработка со нашите партнери од европските земји и беше насочена кон хуман, квалитетен прием на мигрантите и нивно спроведување до понатамошните нивни цели, изјави Димитриев.

По најавите за нов наплив на бегалци долж западнобалканската мигрантска рута, лидерите на земјите што се наоѓаат на балканскиот мигрантски пат се очекува утре да договорат заедничка стратегија за спречување на напливот.

Покрај лидерите на десет земји од ЕУ и надвор од ЕУ, институциите на Европската унија на овој состанок се очекува да ги претставуваат Доналд Туск, претседател на Европскиот совет и еврокомесарот за внатрешни работи и миграциски прашања Димитрис Аврамопулос.