Димитров засега не е на агендата на Дендиас
Објавено во: Македонија 23 Септември, 2019
Министерот за надворешни работи на Грција, Никос Дендиас, кој го придружува грчкиот премиерот Киријакос Мицотакис на Генералното собрание на ОН во Њујорк, ќе учествува во рамките на Министерската недела, но на неговата агенда не е предвидена средба со шефот на македонската дипломатија Никола Димитров.
Според дипломатски извори, како што пренесува новинската агенција АНА-МПА, тој ќе има серија важни средби и контакти со голем број негови колеги, вклучувајќи го и кинескиот министер за надворешни работи Ванг Ји и можност да размени мислења со државниот секретар на САД, Мајк Помпео, функционери од азиските економии во подем и земји од Латинска Америка. Средбата со Ванг Ји ќе биде меѓу првите на грчкиот министер, додека тој ќе се сретне и со неговите колеги од Бугарија, Хрватска и Романија.
Димитров за прв пат се сретна со Дендиас на состанокот на министрите на земјите-членки на ЕУ во Хелсинки на крајот на август. Дендиас и Димитров тогаш потврдија дека на средбата се разговарало за Преспанскиот договор. -Со господинот Димитров ја имавме нашата прва средба на која разговаравме за аспектите на имплементацијата на Договорот од Преспа. Јасно му ставив на знаење на господинот Димитров дека Грција ќе инсистира на строго спроведување на договорот, истакна Дендиас. Во моментов во Њујорк покрај Димитров, премиерот Зоран Заев го придружуваат и други членови на Владата. Засега нема официјална потврда дека Заев утре ќе се сретне со грчкиот премиер Мицотакис.