ДИРЕКТОРКАТА НА „МАКЕДОНИЈАТУРИСТ“ И ЌЕРКА НА ДОНЕ ТАНЕВСКИ, МАРИЈА, ГО ЗАСИЛУВА ПОРТФОЛИОТО - расте цената на акциите на компанијата

Добивај вести на Viber

Директорката на Македонијатурист и ќерка на Доне Таневски, Марија Таневска, е купувачот на 300 акции на компанијата, кои пред околу десетина дена преку блок трансакција поминаа на берзата. Со овој пакет таа сега располага со 736 акции на компанијата.

Компанијата за ова преку ценовно чувствителна информација на Берзата ја извести инвеститорската јавност. 

„Известуваме дека Мирјана Таневска - Ефремова, Претседател на Управен Одбор на Македонијатурист АД Скопје, се стекна со 300 обични акции издадени од Македонијатурист и сега поседува 736 обични акции“, се вели во објавата од компанијата. 

Фактор веќе пишуваше дека „Македонијатурист“ е дефинитивно акционерско „бојно поле“, односно очигледно дека има неколку инвеститори кои сериозно купуваат акции во таа компанија. 

Објавивме дека блоктрансакцијата со 300 акции, каде всушност купувач е Таневска, поминала со цена на акциите од 6.800 денари за акција, што значи дека за нив биле платени над 33 илјади евра. 

Состојбата на Централниот депозитар за хартии од вредност покажува дека над 5 отсто акционери, е таква што Доне Таневски поседува 22,21 отсто, Соња Бибамовска има 11,27 отсто, а пензискиот фонд „Сава“ располага со 8,8 проценти од акциите. Самото АД поседува 10 отсто од акциите. 

Почнувајќи од април годинава, кога во просек била нешто над 5.000 денари, цената на акциите на „Македонијатурист“ постојано оди нагоре, за на 5 јули и на редовниот пазар акциите да се продаваат по 6.800 денари за акција. 

На 11 јули, пак, кога било последното тргување, цената на акциите на компанијата достигна дури 7.480 денари за акција, но беше истргувана многу мала количина од само 15 акции.

Инаку, во април лани објавивме дека наследничка на уникатниот Доне Таневски е неговата ќерка Мирјана, која неколку години наназад е вклучена во високото раководство на друштвото. Оттогаш таа го има главниот збор во управувањето со најголемата македонска хотелиерска компанија

Мирјана Таневска-Ефремова тогаш стана претседателка на Управниот одбор на најголемата македонска хотелиерска компанија „Македонијатурист“. На претседателското место Мирјана го наследи нејзниот татко Доне Таневски, македонскиот маг во хотелиерскиот бизнис и човек кој повеќе од 40 години успешно ја развиваше и водеше „Македонијатурист“. 

Доне Таневски сега е претседател на Надзорниот одбор на оваа компанија. Заедно со Доне Таневски активното раководење со „Македонијатурист“ го напушти и неговата дводецениска „десна рака“ Соња Бибановска која воедно е и втор најголем акционер во најголемата македонска хотелиерска компанија. Но, тие и натаму се најголеми акционери, а Доне Таневски постојано купува акции и го зајакнува своето акционерско портфолио во таа компанија, па ако тогаш имаше околу 19 отсто, сега поседува над 22 отсто од капиталот на компанијата.

Најголемата хотелиерска компанија во Скопје, а воедно и во Македонија, поседува шест хотели.

Н.Н.Ф.