ДИРЕКТОРОТ НА ЕСМ КОВАЧЕВСКИ МУ ИСПОРАЧА НА МИЦКОСКИ ЕДЕН КУП УСЛОВИ ЗА КОМПАНИИТЕ - ако можните снабдувачи ги исполнеле, од нив ќе сме купеле гас и мазут

Добивај вести на Viber

Изминатиот период, а особено вчера лидерот на ВМРО – ДПМНЕ, Христијан Мицкоски, изјави дека тој и неговата партија имаат контакти и  индикативни понуди од компании за набавка на мазут и природен гас со кои што државата ќе заштеди 300 милиони евра.

Секоја понуда во насока на надминување на актуелната криза е добредојдена, вели директорот на ЕСМ, Васко Ковачевски, во изјава за медиумите.

„Затоа, ја користам оваа прилика јавно да го повикам Мицкоски да ги информира сите тие компании од кои има индикативни понуди, а кои биле со важност од една недела, во текот на следните неколку денови, но не подоцна од среда, да ги комплетираат понудите и да ги достават до АД ЕСМ. Понудите од компаниите треба да имаат: технички карактеристики на енергенсот (мазутот или природниот гас), да ги имаат сите сертификати, да ги имаат сите потребни лиценци, да имаат обезбедени количини (250.000 тони мазут и 250.000.000 нормални метри кубни природен гас), да имаат договори со испорачатели, да имаат обезбедено транспорт до производните капацитети (мазутот до ТЕЦ Неготино, РЕК Осломеј и РЕК Битола, а природниот гас до ТЕ-ТО и топланите во Скопје), да имаат динамика на испорака согласно производниот план и да имаат обезбедено банкарска гаранција“, вели Ковачевски.

Тој тврди дека ова се критериуми и услови кои и досега се барале, во сите јавни набавки на овие енергенси. 

„Сите понуди од овие компании кои по препорака на Мицкоски ќе стигнат до ЕСМ во официјална форма, согласно Законот за јавни набавки на енергенси, веднаш ќе бидат разгледани од страна на Комисијата за јавни набавки на АД ЕСМ. Доколку евентуално пристигнат тие понуди и ги исполнуваат сите споменати критериуми и имаат најниска понудена цена, со тие компании ќе бидат склучени договори. Очекуваме, според вчера кажаното, евентуалните понуди да бидат со ниски цени, а со тоа ЕСМ и државата да заштедат 300 милиони евра. Доколку, пак, не пристигнат понуди по препорака на Мицкоски, ќе ја известиме јавноста за исходот на постапката“, пишува Ковачевски во својата изјава.

Како што вчера пишуваше Фактор, Мицкоски вчера на брифинг со новинарите рече дека ВМРО-ДПМНЕ преку свои контакти пронашле компании од Западна Европа кои се подготвени да понудат многу понисаки цени за природен гас и мазут за Македонија.