Добрите вести од САД и Кина доведоа до раст на берзите

Добивај вести на Viber

На азиските берзи цените на акциите растат веќе трет ден по ред, благодарение на знаците за стабилизација на двете големи светски економии, САД и Кина. Индексот на токиската берза Никеи во 07:30 беше до 1,8 отсто, додека цените на акциите во Јужна Кореја, Сингапур, Хонг Конг, Австралија и Шангај се зголемени помеѓу 0,1 и 1,2 отсто. Индексот на акциите Азија-Пацифик МСЦИ, без Јапонија, забележа добивка од 0,6 проценти со што достигна највисоко ниво во последните седум месеци. Во третиот квартал, економијата на Кина се зголеми за 7,4 отсто во споредба со истиот период лани, што е најниска стапка на раст од првиот квартал на 2009 година. Вчера објавените податоци од САД за пазарот на недвижности ја зголемија надежта дека најголемата економија во светот се стабилизира по еден подолг период на бавен раст. Исто така, инвеститорите се надеваат на напредок во решавање на должничката криза во еврозоната на самитот на Европската унија и се во очекување дали Шпанија конечно ќе побара меѓународна помош за спас од кризата. Благодарение на тоа, утрово на девизните пазари, еврото се менува за околу 1,3110 долари, додека вчера наутро чинеше 1,3090 долари. Во однос на јапонската валута, цената на еврото се зголеми и вчера изнесуваше 103,10-103,65 јени.