ДОМ: Да се отвори јавна расправа за најавениот проект во Љубаништа

Добивај вести на Viber

Партијата ДОМ на Лилјана Поповска бара да се отвори јавна расправа за најавениот проект за изградба на туристичкиот комплекс во Љубаништа каде е планирано да инвестира индискиот бизнисмен Субрата Рој.

За да биде успешен најавениот проект за изградба на туристички комплекс на брегот на Охридското Езеро економијата и екологијата мора да бидат ускладени, велат од ДОМ и бараат одговори на неколку прашања.

За нив, како зелена партија, потенцираат дека најважни се еколошките аспекти на проектот во Љубаништа и затоа во јавната дискусија, треба да земат учество државните институции и стручната јавност.

ДОМ, инаку коалициски партнер во власта, денеска на прес- конференција јавно праша:

- На колкава површина, со кои граници и на колкава должина на брегот ќе се протега? За колкав број туристи се планира и што би значело тоа како густина на население во еден момент, во однос на користењето на езерскиот брег и на терените околу него? Со која сообраќајна инфраструктура и средства тие туристи ќе  пристигнат таму? Колку чиста вода ќе биде потребна дневно и од каде ќе се обезбеди? Колку отпад и отпадни води ќе се произведуваат дневно и каде ќе се одведуваат - прашуваат од ДОМ.

Портпаролот Тони Ристов кажа дека има уште многу еколошки прашања, но ДОМ започнува со најважните, за да ја насочат дискусијата во конструктивна насока, со користење стручни аргументи, ослободени од политизирање.