Државата ќе враќа општински долгови, одговорност од градоначалници нема
Објавено во: Економија 23 Октомври, 2018
Владата им дава на општините на располагање 50 милиони евра за да си вратат стари долгови, а според законот кој вчера помина на владина седница секоја општина ќе добие неповратни средства за да покрие 51 отсто од пријавените обврски. Додека се тврди дека ова е значајна поддршка и поттик за општините, дел од аналитичарите велат дека на ваков начин се толерира неодговорното работење. Од Центарот за економски анализи (ЦЕА) велат дека со мерката се праќа сигнал дека се исплатуваат незаконските дејствувања, неодговорното работење и немањето на отчетност.
„Економските субјекти се изложуваат на нефер и дискриминаторска положба во однос на државата. Се креираат пазарни девијации на пазарот на капитал.
Ваков инструмент води кон синдикализирање на трошоците од неодговорно работење на избрани и именувани функционери. Кога се синдикализира трошокот од неосигурани ризици се креира неодговорност (moral hazard). Имено, знаејќи дека ќе поминат без соодветна казна за неодговорно работење со даночните средства на граѓаните се креира ситуација на отсуство на секаква грижа за управување со ризиците соодветно на можностите и ресурсите на општините од страна на неодговорните Градоначалници. Трошокот за неодговорното работење во заробената држава паѓа на товар и на оние кои не се одговорни за неодговорното и надвор од законот работење, велат од ЦЕА.
Оттаму сугерираат Министерството за финансии да направи анализа како настанале долговите и да повика на одговорност, а да се вклучи и Државниот завод за ревизија и Јавното обвинителство.
Министерот за финансии Драган Тевдовски вчера рече дека Владата ќе воспостави механизам за спречување на акумулирање на долгови во иднина. Се предлагаат измени на Законот за финансирање на единиците на локалната самоуправа со воспоставување на фискално правило за планирање на сопствените приходи на основниот буџет на единиците на локалната самоуправа.
„Преоптимистичкото планирање на приходите е една од причините поради кои општините креираа неизмирени обврски во претходните години. Со предлог измените на Законот се воведува ограничување при планирање на сопствените приходи на основниот буџет на општините, во смисла истите да може да се планираат со пораст од најмногу 10% од просечно остварените приходи во последните три години, според податоците од трезорската евиденција. Во однос на истото се предвидени исклучоци само доколку општината има обезбедено потврда за трансфер на средства од соодветна институција за реализација на проекти во општината, рече Тевдовски
Заклучно со 30 септември годинава, електронскиот систем за евиденција на Министерството за финансии забележал стари пријавени доспеани, а неплатени обврски, во износ од 18,817 милијарди денари. Ова е за 3,527 милијарди денари помалку во однос на обврските пријавени со пресечен датум 31 мај 2017 година. Намалувањето се должи на намалувањето на неплатените обврски кај буџетските корисници на национално ниво во износ од 3,6 милијарди денари во споредба со мај 2017 година.
А.Т.