ДУИ го повика ВМРО-ДПМНЕ да реагира рационално, а не емотивно

Добивај вести на Viber

ДУИ излезе со свој став откако од ВМРО-ДПМНЕ претходно посочија дека нема никакви услови за прифаќање на барањата за нов мандат на СЈО и воведување на двојазичност на целата територија на Република Македонија, што ќе значи и промена на уставот. ДУИ им порачаа на нив, но и на другите страни дека треба да се носат рационални, а не емотивни одлуки.

Употребата на албанскиот јазик во согласност со Охридскиот Договор и Уставот, еднакво со македонскиот јазик, го прави општеството посилно, пообединето и постабилно заокружувајќи ги тој начин нормативните обврски од Охридскиот мировен договор, велат од ДУИ по соопштението на ВМРО-ДПМНЕ.

„Владеењето на правото во земјата е обврска на сите политички партии и претставува предуслов за продолжување на евроатлантскиот пат.

Реформите во судството, транспарентноста и ревидирањето на спорните судски процеси се неопходна обврска за враќање на довербата на граѓаните кон системот.

Од почетокот на политичката криза во земјата, Демократската унија за интеграција инсистираше на транспаренто затварање на процесот преку целосно обелоденување на скандалот со масовното и незаконско прислушување и преземање на одговорност.

ДУИ останува посветена за едно кохезивно општество, еднакво и интегрирано во евроатлантската заедница и ги повикува страните да делуваат со историска одговорност кон процесите со кои се соочува земјата и регионот при што треба да прават рационални а не емотивно поттикнати проценки“, стои во соопштението на ДУИ.