ДВА МЕСЕЦИ ИМАВ УКАЖУВАЊА ДА ЈА ПОВЛЕЧАМ КАНДИДАТУРАТА: Обвинителката Ристоска за неприфаќањето на кандидатите за судии во Стразбур

Добивај вести на Viber

Обвинителката Ленче Ристоска, која беше кандидат за судија во Стразбур, преку Фејсбук даде појаснување за тоа што се случувало последните два месеци, пред владата да посочи дека кандидатите не ги исполнуваат критериумите за кандидатура.

„Со оглед дека Владата одбива да даде појаснување за тоа кои критериуми не ги исполнуваме како кандидати, што е спротивно на препораките на Советот на Европа, сакам да појаснам неколку работи. Последниве два месеци имав укажувања дека треба да ја повлечам мојата кандидатура за судија во судот во Стразбур, а во исто време во јавноста се одвиваше и клеветничка кампања против мене. Затоа и потегот на Владата за неприфаќање на листата за мене беше очекуван, само формата како Владата ќе се обиде да ги прекрши процедурата и препораките на Совет на Европа за избор на кандидати за судии, но и насоките што самата Влада ги дала на Комисијата во решението за нејзино формирање беше неизвесна“, вели Ристоска.

Таа посочи и дека владината одлука е неиздржана, што според неа, може да се насети од општата формулација за неприфаќањето на листата на кандидати.

„Неиздржаноста на одлуката на Владата може да се насети од општата формулација за неприфаќање на листата, од нетранспарентноста и одбивањето да се дадат конкретни информации за критериумите кои наводно кандидатите не ги исполнуваат. Според препораките на Советот на Европа, постапката мора да биде извесна и однапред пропишана, фер и транспарентна. При вакви услови сосема е нормално и прифатливо и да не сте најдобриот кандидат и да не ја добиете позицијата за која аплицирате. Најповикани и најстручни да ги оценат кандидатите во рамки на националната селекција се Комисијата која беше формирана со оваа цел, како и советодавното тело на Советот на Европа, кои токму затоа се дел од процесот за предлагање на кандидати за судии во Европскиот суд за човекови права, а Владата согласно препораките на Совет на Европа мора да го оправда секое отстапување од листата утврдена од Комисијата“, посочи Ристоска.