Еди Рама победи на изборите и ќе биде новиот премиер на Албанија

Добивај вести на Viber

Нов премиер во Албанија ќе биде лидерот на социјалистите Еди Рама, така одлучи победничката коалиција  „Алијанса за Европска Албанија“ на неделните парламентарни избори во Албанија.

„Јас ќе бидам новиот премиер. Така е договорено и ветувам дека Албанија ќе оди напред со левицата“, изјави Рама , во своето победничко обраќање до членовите и симпатизерите на левицата во Тирана.

Неговиот партнер во коалицијата претседателот на партијата „Движење за Социјалистичка Интеграција“, Илир Мета, нагласи дека местото премиер му следува на Рама , но притоа не даде објаснувања која ќе биде неговата функција во новата влада.

Коалицијата за европска Албанија, која ја преводи „Социјалистичката партија“ на Еди Рама, од вкупно 80 отсто од избројаните гласачки места во 12 изборни региони во земјата, има освоено засега 84 мандати, додека „Коалицијата за вработување, благосостојба и интеграции“, предводена од „Демократската партија“ на Сали Бериша, има 53 мандати.

Освоените мандати на партијата на Мета и на Рама заедно надминуваат 84 пратенички места, што значи и доминација во новиот состав на Собранието. Албанскиот парламент има 140 места, а досегашната опозиција сега обезбеди двотретинско и можност лесно да донесуваат значајни одлуки.

Засега мандати во албанскиот парламент освоија и две партии кои се надвор од коалициите - партијата „Нов демократски дух“ на експретседателот Бамир Топи и партијата ,Црно-црвена алијанса на Крешник.

Без ниту еден мандат останаа партијата партијата на Македонците „МАЕИ“, партијата на Грците на Вангел Дуле,„ Црвено- црната Алијанса“ на Спахиу и некои други познати политички субјекти.

„За жал, генерално има поделеност меѓу нас, Македонците, тука, дури мои роднини не гласаа за мене, па што понатаму“, вака, меѓу другото, ги опиша своите впечатоци по денот на гласањето во Албанија единствената кандидатка на Македонската алијанса за европска интеграција, Валентина Нестор, во која партијата гледаше најголем потенцијал за пратеник во парламентот во Тирана.

Таа за „Дневник“ рече дека е разочарана од недоволната активност на членовите на партијата во предизборната кампања и дека Македонците во Албанија не се залагаат за своето општо добро и за угледот на заедницата таму, ами само за лична корист.

ОБСЕ-ОДИХР, како и претставници на ЕУ и на САД оценуваат дека ако се исклучи тешкиот инцидент во Лач кога дојде и до убиство и ранување, како и многубројните проблеми од технички план, изборниот процес бележи напредок во Албанија.