Еди Рама со автобус од Белград за Прешево

Добивај вести на Viber

В понеделник албанскиот премиер Еди Рама треба да допатува во историска посета на Белград, која се случува во услови на исклучително заладени односи меѓу двете земји заради инцидентите на фудбалскиот натпревар Србија-Албанија за кои српските власти го сомничат братот на албанскиот премиер. Рама е првиот албански премиер кој ќе допатува во Белград по повеќе децении. Во пресрет на посетата, тој најави дека ваквиот чекор претставува нов почеток за целиот Балкан. „Ова време бара нов пообединет пристап за една иднина која треба да биде подобра за сите наши народи, оставајќи го зад себе сето она од минатото што само не спречуваше да тргнеме напред, и предизвикуваше многу судири и донесе многу крвопролевања, а кое треба да го оставиме на минатото и заедно да испишеме една нова историја за мир и регионална соработка“, рече Рама во интервју пред посетата. Албанскиот премиер има намера посетата на Белград да ја искористи за посета и на Прешево, регион населен доминантно со албанско население, во близина на границата со Македонија. Според сознанијата на српските медиуми, албанската амбасада во Белград веќе изнајмила автобус со кој Рама и уште 50-тина негови соработници ќе заминат од Белград за Прешево, каде што локалните Албанци организираат митинг за да го пречекаат. Во плановите за посетата на Белград, што ги доставил Рама до своите домаќини, тој имаше намера на официјална церемонија симболично да му бидат предадени и клучевите на Белград, но српските власти засега не потврдија дека гостинот може да се надева на таква почест.