Добивај вести на Viber
Претседателот Барак Обама прогласи вонредна состојба во сојузната држава Западна Вирџинија, откако излевање на хемикалија остави 300.000 лица без вода за пиење и предизвика затворање на училиштата и бизнисите, објави Гласот на Америка.
Хемикалијата 4-метилциклохексан метанол, што се употребува во индустријата за јаглен, се излеала во реката Елк во главниот град Чарлстон, во близина на централа за прочистување на водата. Излевањето се случило од складиштен контејнер на компанијата „Фридом индастрис“, која се опишува како производител на специјални хемикалии за индустријата на јаглен, челик и цемент. Компанијата за сега не го коментира инцидентот, но главниот обвинител во областа соопшти дека властите на федерално ниво започнале истрага за случајот.
Властите ги предупредија жителите да не ја користат водата од водоводот за пиење, капење, готвење или пак перење на облеката. Траат напорите да се достават доволни количини вода во шишиња, а низ цела Западна Вирџинија се отворени центри за дистрибуција на вода.
Се` уште не се знае колкава количина од хемикалијата се излеала во реката, а штетите од еколошкиот инцидент допрва ќе се проценуваат.