ЕЛЕМ бара изведувач за новата барокна зграда

Добивај вести на Viber

Државната компанија ЕЛЕМ, деновиве распиша јавен оглас за избор на градежна компанија која што ќе го гради, новиот административен објект, спроти хотелот “Бристол”. Идејното решение за објект, кое ЕЛЕМ го избра пред извесен период, е на архитектите Лазар Димов, Жарко Чаушевски, Стефан Смилевски и архитектонското студио “Неимар инженеринг”, и предвидува фасадата на новиот објект, да биде во неокласицистички стил, односно во согласнот со проектот Скопје 2014 . Според Деталниот урбанистички план за овој дел од центарот на градот, грaдежната парцела на која што ќе се гради новиот објект е со големина од 1.432 метри квадратни и вкупна бруто развиена површина од  9.130 метри квадратни. Новиот објект ќе биде со висина од 29 метри, односно ќе има осум ката и поткровје, a ќе биде сместен на аголот помеѓу улиците Македонија и Мито Хаџивасилев Јасмин. Според условите во тендерот, за најповолен понудувач ќе биде избран тој што ќе понуди најниска цена, и ќе има обврска новата административна зграда да ја изгради за година и пол. Која компанија ќе победи на огласот, ќе се знае по 3-ти декември, кога ќе биде и јавното отворање на понудите. Во близина на оваа локација, односно на аголот помеѓу улицата Македонија и Даме Груев, ќе се гради уште еден административен објект со висина од исто така 29 метри, во кој ќе бидат сместени седум институции, односно Централниот регистар, Комисијата за хартии од вредност, Агенцијата за супервизија, Регулаторната комисија, М-НАВ,  и дел од АД за стопанисување со станбен и деловен простор и Фондот за осигурување на депозити. Носењето на овој ДУП предизвика голем револт не само кај граѓаните, туку и кај стручната јавност, бидејќи целиот зелен простор, сега ќе се замени со бетон. Но и покрај нивните противења и апели да не се уништува ова зелнило, градежните работи на терен си се спроведуваат. Минатата недела за таа цел по налог на Градот Скопје,  комплетно се исекоа околу педесетина дрвја стари и по неколку децении.