ЕНИГМА ЗА КОБНИОТ 12 АПРИЛ 2012: Ќе победи ли правдата за петкратното убиство кај Смилковско езеро?

Добивај вести на Viber

На кобниот 12 април 2012 со огнено оружје е извршено убиство на пет лица  кај езерото во атарот на селото Смилковци, близу Скопје. Масакарот кај Смилковското езеро се случи на Велики четврток, пред големиот христијански празник Велигден.

Свирепо се убиени четири момчиња на возраст од 18 до 21 година од населбата Радишани:  Кире Тричковски, Филип Славковски, Цветанчо Ацковски, Александар Наќевски како и рибарот Борче Стефановски(45). Убиствата се случиле меѓу 19:30 и 22:30 часот кога биле најдени телата на убиените.

Обдукцијата  покажала дека во нив е пукано од три типа огнено оружје, затоа што се најдени чаури од три различни типа муниција, што алудира дека има повеќе од еден извршител на чинот.

Истрагата започнува распреплетено и макотрпно.

Автомобил „Опел Омега“ со темноцрвена боја бил пронајден на 10 километри од местото на убиствата. Министерката Јанкуловска на 16 април 2012 потврдила дека возилото што го нашла полицијата било на самото место на убиството. 

„Трагите укажуваат дека токму ова возило било на местото на убиството. Упатуваме апел доколку некој го препознае, го забележал, да се јави на бројот 199“, изјавила Јанкулоска. 

Возилото било донесено од странство и не било региститрирано во Македонија, но имало украдени регистерски таблички, кои своевремено припаѓале на Мерцедес, кој веќе не учествувал во сообраќајот.

Што се крие зад крвавиот настан?

Метју Брунвасер, дописник од Софија за американскиот дневен весник New York Times („Њујорк Тајмс“), во напис со наслов „Убиствата ги засилуваат етничките тензии во Македонија“ забележува дека „...Македонците беа во жалост заради смртта на петмина сонародници, во ситуација кога има шпекулации дека убијците се етнички Албанци, со што се појавија стравувања за нова рунда на насилство меѓу заедниците.“

За петкратното убиство кај Смилковското езеро, на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Сами Љута.

По укинувањето на пресудите, Врховниот суд во декември лани ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. За Судот сѐ уште недостапни се Алил Демири и Африм Исмаиловиќ по кои се распишани меѓународни потерници.

Предметот стигна и до СЈО.

-Се надеваме дека за рочиштето во април ќе бидеме подготвени за презентирање пред судот. Постапката продолжува во фазата во која се наоѓа предметот – изјави специјалната јавна обвинителка Катица Јанева на прес-конференција на 21/03/2018.