ЕСМ го демантира ВМРО-ДПМНЕ: Блок 1 не е во дефект, туку е плански исклучен
Објавено во: Економија 24 Јануари, 2023
АД ЕСМ ги демантира информациите што во јавноста ги пласира политичката партија ВМРО – ДПМНЕ со реакција дека Блок 1 на РЕК Битола не е во дефект од вчера, туку дека е плански исклучен.
„Во РЕК Битола нема дефект на Блок 1, ниту било какви други сериозни проблеми на некоја од постројките. Блок 1 на РЕК Битола е плански исклучен од мрежа заради повеќе интервенции на различни позиции во постројката. Предвидено е активностите да завршат до сабота и викендов Блок 1 повторно да биде ставен во функција“, објави ЕСМ.
Од таму додаваат дека активностите се преземени плански токму деновиве бидејќи сите останати капацитети на АД ЕСМ се во погон.
ВМРО-ДПМНЕ претходно објави дека Блок 1 на РЕК Битола има скинати цевки на котел.