ЕУ не дозволува укинување на роамингот со Балканот

Добивај вести на Viber

Ништо од најавите за укинување на роамингот во балканските земји. Европскиот парламент денеска и официјално ја потврди одлуката со која од 15 декември 2015 година целосно ќе се укине роамингот на територијата на земјите-членки на ЕУ. Така, разговорите, СМС пораките и преносот на податоци ќе има исти цени за корисниците од целата Европска унија, без разлика каде во ЕУ се наоѓаат во тој момент. Иако Македонија, Србија и Црна Гора официјално се обратија до Брисел со барање ваквата мерка да се прошири и на балканските земји-кандидатки за членство во ЕУ, сепак од Европската комисија добиле одговор дека засега ова не е можно. „Надлежните министри од овие три земји уште во јули 2013 година потпишаа заедничко писмо и го испратија до Европската комисија, но, за жал, добивме одговор дека во моментот не е возможно оваа регулатива да се прошири на нашиот регион, односно дека таа е применлива само во државите-членки на ЕУ“, откри државниот секретар во српското Министерство за трговија и телекомуникации Стефан Лазаревиќ. И македонските власти полагаа големи надежи дека ваквата мерка наскоро ќе може да важи и за граѓаните на Македонија, што неколкупати досега го најавуваше и првиот човек на Агенцијата за електронски комуникации. Земјите-членки на ЕУ одлучија меѓусебно да го укинат роамингот откако утврдија дека цените што ги наплаќаат телефонските компании за дојдовни и појдовни повици од една до друга земја-членка на ЕУ се повеќепати неоправдано зголемени.