Еве кој и каков автомобил купува во Европа

Добивај вести на Viber

Пазарот на автомобили во Европа во септември повторно бил во пораст, продадени се 6,4 одсто повеќе нови возила а најголем скок е забележан во Шпанија.

Како што соопшти Асоцијацијата на европски произведувачи на автомобили  (ACEA), на европско ниво во септември се продадени 1,23 милиони возила, наспроти 1,16 милиони во истиот период минатата година.

Меѓутоа, продажбата и понатаму е ниска за разлика од времето пред кризата  (2005-2006) кога месечно изнесуваше 1,4 милиони.

Во Шпанија, каде продажбата се преполовила поради економската криза, во овој септември е остварен раст од 26,2 одсто, додека на францускиот пазар изесувал 6,3 одсто, во Велика Британија 5,6 одсто, Германија 5,2 одсто, Италија 3,3 одсто.

И останатите земји на Јужна Европа имаа висока стапка на раст во септември - Грција 32,6 одсто, Португалија 31,7 одсто, Кипар 28,9 одсто, но обемот на продажба и понатаму е на ниско ниво.

Како што наведува истиот извор, на пазарот на автомобили, кој е уште во фаза на оправување, но со 13-месечен раст по ред, француските произведувачи бележат забележителен раст, Рено 10,7 одсто, ПСА Пежо-Ситроен 9,8 одсто во однос на септември 2013.

Сепак, најмногу продадени возила во ЕУ имал Фолксваген, со 290.500 единици во септември, со стапка на раст од 7,9 одсто за девет месеци.

Форд е на четвртата позиција според бројот на продадени автомобили од почетокот на годината до крајот на септември, со стапка на раст од 7,3 одсто, додека Џенерал моторс во истиот период имал пад од 3,3 одсто.

Италијански Фиат за девет месеци забележал раст по стапка од 2,7 одсто, германската компанија БМВ од 2,3 одсто а Дајмлер 2,1 одсто.

Во соопштението се истакнува дека одличен резултат остварил и јапонскиот Нисан, партнерот Рено, кој во септември ја зголемил продажбата на 16,9 одсто, иако Тојота на пазарот на ЕУ останала „број еден“ од јапонските произведувачи, со продажба на 400 илјади возила во девет месеци оваа година.

И.Р