Eвропска земја воспоставува резерви на храна за војна: Секое домаќинство добива план за преживување

Добивај вести на Viber

Шведската влада почна со формирање на првите стратешки залихи на жито во северните делови на земјата, во региони кои, во случај на вооружен конфликт, би можеле да бидат отсечени од остатокот од земјата. Во буџетот за 2026 година, планирани се 575 милиони круни (околу 60 милиони долари) за формирање резерви за итни случаи, објави владата во Стокхолм.

Според Шведскиот одбор за земјоделство, залихите редовно ќе се надополнуваат за да се спречи расипување, а ќе се објавуваат тендери во окрузите Норботен, Вестерботен, Вестернорланд и Јемтланд - области кои моментално зависат од пратки жито од јужна Шведска.

Министерот за цивилна заштита Карл-Оскар Болин истакна дека северот на земјата е „клучен за одбранбената стратегија на Шведска“ и дека токму таму започнува воспоставувањето резерви за населението да има пристап до храна дури и за време на војната.

Планот е дел од поширока национална стратегија за мобилизирање на целото општество - од институциите и армијата до граѓаните и компаниите - со цел подготовка на земјата за можни кризни и воени ситуации. Според проценките на Одборот за земјоделство, залихите би можеле да обезбедат храна за 90 до 95 проценти од населението за три месеци, со просечна потрошувачка од 3.000 калории дневно по лице.

Овој потег доаѓа во време на растечки тензии во регионот на Балтичкото Море. По руската анексија на Крим во 2014 година и инвазијата на Украина во 2022 година, Шведска го обнови концептот на „тотална одбрана“ и стана членка на НАТО минатата година. Премиерот Улф Кристерсон предупреди дека земјата „не е во војна, но не е ни во мир“, посочувајќи на хибридните напади и заканите за подморничката инфраструктура.

foto frepik.com