ФАКТОР ДОЗНАВА: Ивермектин има само во клиничката аптека на Аџибадем Систина

Добивај вести на Viber

Во аптеките се создаваат огромни гужви од граѓани кои го бараат лекот Ивермектин, за кој од вчера има најава од Министерство за здравство дека го имаме во земјава. Лекот не е на позитивната листа на лекови на ФЗОМ, но по медицинска индикација и со розев рецепт матичните лекари веќе го препишуваат на своите пациенти. Малопродажната цена на Ивермектинот чини 299 денари.

Фактор дознава дека овој моќен антипаразитик, за кој има бројни клинички студии дека дава одлични резултати во третманот на болните, но и дека превентивно делува на оние кои биле во контакт со инфициран од Ковид-19, засега го има само во клиничката аптека на приватната здравствена установа „Аџибадем Систина“.

Изворите на Фактор појаснуваат дека „Ивермектин“ се дава само на хоспитализираните пациенти во болницата, и само на пациентите на „Аџибадем Систина“.

Инаку, протоколот преку Лекарската комора уште вчера беше испратен до матичните лекари, а како што информираат од Министерството за здравство, до крајот на неделата Лекарската комора ќе организира и онлајн предавање за матичните лекари во цела земја за да се дообјаснат пртоколите, а веќе следната недела ЛК ќе организира онлајн дискусија со клиничките доктори (лекарите кои работат во болниците) за употребата на лекот.

Министерството за здравство потенцира дека Ивермектинот е антипаразитски лек со широк спектар на делување, неговата примена треба да биде исклучиво под лекарски надзор без разлика дали станува збор за домашно лекување или хоспитализација.

-Апелираме граѓаните на своја рака да не го пијат лекот Ивермектин, бидејќи единствено лекар може да утврди дали постојат индикации за користење на лекот и доколку постојат во која доза и во комбинација со кои други лекови може да се користи Ивермектинот, порачуваат од Министерството за здравство.