ФАКТОР НА ДЕНОТ: Се слави Илинден, политичарите упатија пораки за единство

Добивај вести на Viber

ПО ПОВОД ИЛИНДЕН ПОЛИТИЧАРИТЕ УПАТИЈА ПОРАКИ ЗА СПЛОТЕНОСТ

Премиерот Оливер Спасовски денеска од прославата на Илинден во Скопје, изјави дека се слави Денот на Републиката под слоганот „Победа за сите“. 

Вели дека денес Македонија е успешна приказна и светол пример во Западен Балкан. 

„Денес славиме празник за подобро утре на оваа и на сите идни геенрации, за да ја градиме нашата вековна иднина“, рече Спасовски. 

Кажа дека Македонија ќе ја градиме како граѓанска држава. 

„Должни сме да се спротивставиме на фашизмот, гласно и храбро“, рече премиерот. 

Вели дека гордо треба да го славиме македонскиот јазик, кој денес е впишан во личната карта на нашата држава во ОН. 

Претседателот на државата, Стево Пендаровски во Пелинце изјави дека македонските граѓани се обединети околу човечковите права, слобода, демократија. 

Вели дека пандемијата се заканува целосно да го промени нашиот начин на живот. 

Кажа дека е ограничено патувањето и социјализацијата. 

„Оттуѓувањето кое го однесе оваа криза, сериозно ја загрозува нашата меѓусебна солидарност, со оние кои поминуваат низ пеколот на болеста и оние кои ги изгубија своите работни места“, рече претседателот. 

Потпретседателот на Собранието, Горан Мисовски денеска во Крушево изјави дека сме исправени пред опасноста Ковид -19, кој е тежок предизвик за здравствениот систем. 

Вели дека од сето ова ќе излеземе со повеќе искуство, и со вредност, а тоа е солидарноста. 

Им се заблагодари на здравствените работници, за нивната посветеност, хуманост и солидарност. 

„Работевме напорно за да бидеме дел од НАТО сојузот, да изградиме стабилна, силна и економски просперитетна Македонија. Да се биде под чадорот на НАТО значи колективна безбедност, значи „сите за еден, еден за сите“, вели тој. 

Лидерот на ВМРО-ДПМНЕ, Христијан Мицкоски, од струшкото село Ташмаруништа на граѓаните им го честита Илинден.

„Денес оние кои се товар во ВМРО душмански жестоко се обраќаат кон ВМРО. Целосно свесен за нивните постапки од минатото, и целосно свесен дека токму овие жестоки по-јаничарени јуришници на власта беа и товар на партијата, сакам јасно и недвосмилено да истакнам дека јас како претседател на ВМРО-ДПМНЕ му се извинувам на народот за сите грешки и неправди кои овие луѓе ги имаат направено. Тие во ВМРО гледаат личен интерес, а јас во ВМРО-ДПМНЕ гледам кауза. Јас повеќе не сакам да ги коментирам, верувам во народот и верувам дека народот сосема јасно разбира за што овде се работи и кој за што се бори, кој ја сака и кој работи за Македонија.

ДЕНЕС 166 НОВИ ЗАРАЗЕНИ И 4 ПОЧИНАТИ ОД КОРОНАВИРУСОТ

Министерството за здравство информира дека во последните 24 часа се направени 1419 тестирања, а регистрирани се 166 нови случаи на ковид-19 во: Скопје-47, Куманово-17, Дебар-1, Штип-23, Тетово-12, Струга-7, Битола-1, Охрид-3, Кавадарци-9, Гостивар-15, Гевгелија-1, Струмица-1, Демир Хисар-1, Македонски Брод-10, Виница-2, Свети Николе-2, Кичево-12, Неготино-2.

Денеска Институтот за јавно здравје регистрира 185 оздравени пациенти од: Скопје-98, Куманово-17, Штип-25, Битола-8, Гостивар-15, Радовиш-2, Пробиштип-1, Свети Николе-12, Кичево-3, Ресен-4.

СЕ ЗГОЛЕМИЛ ЈАВНИОТ ДОЛГ

Jавниот долг, кој ги вклучува државниот, гарантираниот и негарантираниот долг заклучно второто тримесечје од 2020 изнесува 59,5% од БДП, што споредено со претходното тримесечје претставува зголемување за 8,8 процентни поени.

Државниот долг заклучно второто тримесечје е 50,7% од БДП, што споредено со претходното тримесечје повеќе за 8,9 процентни поени.