ФАКТОР НА ДЕНОТ: Утревечер слободно движење, а од четврток полицискиот час ќе почнува од полноќ

Добивај вести на Viber

ПОЛИЦИСКИОТ ЧАС ЌЕ ПОЧНУВА ОД ПОЛНОЌ

Владата на 69-та редовна седница, донела одлука, забраната и посебниот режим на движење на населението и возилата од јавен превоз од 12 мај 2021 да почнува од 24:00 часот до 04:00 часот наутро наредниот ден.

Сепак за Бајрам односно на 12 мај, како што беше првично соопштено, полициски час нема да има.

Дозволено време за работа на угостителските објекти за работа со посетители/гости во отворениот дел од угостителскиот објект (само летни тераси, градини, а не во затворениот дел) е до 23:30 часот, почнувајќи од 12 мај 2021 година.

ИМА 171 ЗАРАЗЕН И 26 ПОЧИНАТИ ОД КОРОНАВИРУСОТ

Министерството за здравство информира, согласно податоците од Институтот за јавно здравје:

Во последните 24 часа се направени 2.357 тестирања, а регистриран е 171 нов случај на КОВИД-19 во:

Скопје – 58, Куманово – 16, Битола и Радовиш – по 9, Виница – 8, Кочани и Кичево – по 7, Прилеп, Охрид и Штип – по 6, Велес и Струмица – по 5, Тетово, Гостивар и Ресен – по 4, Кавадарци – 3, Струга, Неготино, Свети Николе, Кратово и Македонска Каменица - по 2, Делчево, Пробиштип,Крушево и Демир Хисар – по 1.

Регистрирани се 409 оздравени пациенти од:

Скопје – 171, Прилеп – 39, Куманово – 37, Битола – 36, Тетово – 15, Велес – 13, Гостивар – 12, Кичево – 11, Штип – 10, Струмица – 9, Кавадарци и Радовиш – по 8, Крива Паланка – 6, Охрид и Кочани – по 5, Виница и Демир Хисар – по 4, Дебар и Пробиштип – по 3, Неготино, Ресен и Богданци – по 2, Гевгелија, Свети Николе, Берово и Делчево – по 1.

Пријавени се вкупно 26 починати лица. 

ЌЕ ПРИСТИГНАТ НОВИ ВАКЦИНИ ОД АСТРА ЗЕНЕКА

Во петок во земјава пристигнуваат уште 38.400 вакцини Астра Зенека. 

Дека ќе стигне нова пратка вакцини, соопшти министерот за здравство, Венко Филипче на Фејсбук. Toj повика граѓаните да се пријавуваат за вакцинација. 

МАКЕДОНСКИ ВОЈНИК ВО АФРИКА СЕ ЗАРАЗИЛ СО КОРОНАВИРУСОТ

Македонскиот војник заболен од коронавирус во Африка е потполковник кој служел во рамките на  Европската мисија во Централноафриканската Република и вечерва треба да пристигне под посебна евакуација во Скопје, потврди Радмила Шекеринска, министерката за одбрана.

- Еден од нашите припадници, потполковник на армијата, кој учествува во Европската мисија во Централноафриканската Република, минатата недела беше тестиран како позитивен на корона-вирусот и бидејќи состојбата не беше доживеана од страна на медицинските експерти како целосно под контрола, по препорака на медицинските експерти во ЕУ-мисијата, тој ќе биде со медицинска евакуација донесен дома во Скопје, претпоставувам доцна вечерта, рече Шекеринска.

ЧИТАЈТЕ УШТЕ

Армија луѓе во земјава работат на „црно“. Истражувањето на Аналитика чии податоци беа презентирани минатата недела, покажуваат дека повеќе од 128.000 луѓе во Македонија работат на „црно“. 

„Уготур“ плати 58 денари за секоја купена сопствена акција која многу ретко се тргува, а последната цена и била 28 денари. Законската регулатива дозволува и не забранува откуп на сопствени акции по дефинирани цени. 

Денес цената на стан во центарот на Скопје, со идентичен квалитет на градба, се поистоветува со цената на стан во центарот на Ниш, помалку чини од стан во Нови Сад, а дури двапати помалку чини отколку стан во центарот на Белград, вели во интервју за Фактор Андреа Серафимовски, претседател на Здружението на градежништво индустријата на градежни материјали и неметали при Стопанската комора. 

Владата уште не му нашла наследник на неодамна разрешениот директор на Државниот пазарен инспекторат, Стојко Пауновски, кој неодамна беше сменет од челната позиција, по три години успешно директорување со инспекторатот, и тоа поради пркос кон државниот врв, или, како што наведоа тогаш во владиното соопштение, поради непрофесионално однесување, согласно Кодексот за етичко однесување на владините членови.

Државата следната година ќе купува резервно гориво за 73,35 милиони евра, според Акциски план за формирање на нафтени резерви кој е наметнат од ЕУ, а кој го објави Владата со кој ќе треба да се исполнат капацитетите за негово чување. Чувањето на купената количина ќе предизвика дополнителни трошоци, со што во 2022 ќе треба да се најдат 83 милиони евра.

Цената ја утврдува Владата, а не може да биде пониска од 0,30 евра по метар квадратен ниту повисока од 1 евро по метар квадратен, стои во првичната верзија на Законот за продажба на земјоделско земјиште која е прикачена на ЕНЕР.