(Фотогалерија) ИСТОРИЈА: ВЕЛИГДЕН без верници, молитва и за здравјето на заболените

Добивај вести на Viber

Поминуваме низ еден период кој од нас бара послушност и воздржување. Појавата на корона – вирусот во светот, а воедно и во нашава земја, нè натера да внимаваме и на нашето и на здравјето на нашите ближни. Затоа, да се придржуваме по советите и мерките изречени од надлежните институции, и сите заедно да придонесеме да се намали и спречи ширењето на заразата. На нашите верници им советуваме да истраат и да не се вознемируваат затоа што не можат да присуствуваат бројно на светите богослужби во храмовите, и им препорачуваме да се молат во своите домови и срца, за Бог да нè избави од оваа опасна болест. Да се молиме и за медицинските лица, полицијата и војската кои напорно се грижат за заболените и за редот во државата. Да се молиме за заболените да оздрават, како и за спасение на душите на оние кои не ја добија битката со болеста. Да се молиме Бог да ни ги прости нашите гревови и да нè помилува, зашто самоБог ни е прибежиште и сила, и докажан помошник во неволја, рече поглаварот ма Македонската православна црква Г.Г. Стефан.

Тој вечерва ја водеше Велигденската богослужба во Соборниот храм Св. Климент Охридски во Скопје како и секоја година - овојпат испишувајќи историја - без присуство на верници во храмот.

Македонија и светот се пред голем предизвик, а ова празнување на Велигден е историско.

Освен свештениците и фоторепортерите верници во храмот немаше.

Затоа,во маката да бидеме трпеливи,а во молитвата постојани,зашто Воскреснатиот Господ е нашата надеж. Нека овој период ни биде време за покајание и за засилена молитва. Искушенијата што нè снајдоа нека ни бидат за утврдување во верата и за духовно напредување. Сè е возможно за оние што веруваат, заштоГоспод знае како да ги избавува побожните од искушенија. Воскреснатиот Спасител е Лекарот на душите и телата, и Тој лекува и обновува, ја осветува и ја вознесува човечката природа. Затоа, и не само во овие празнични денови, туку постојано и насекаде да ја живееме светоста на нашата христијанска вера, на верата што го победи светот. Да ја споделиме со сите радоста на Воскресението на вечниот Лечител, и никогаш да не заборавиме на тоа дека колку сме поблиски до Бога, толку и Бог ќе биде близу до нас, рече поглаварот.

Христовата победата над гревот и над смртта, по претрпеното распетие и славното воскресение, е најголемата победа на сите времиња. Таа е единствена и вечна, и постигната е еднаш и засекогаш! Затоа, само соединети во Христа, преку молитвата и преку светите Тајни, и со исполнувањето на Неговите заповеди, можеме да го победуваме гревот и да се здобиеме со спасение и вечен живот, вели г.г. Стефан.

Христос воскресе! Навистина воскресе!

Фото: Вангел Тануровски