Германија воведува патарина за странци!

Добивај вести на Viber

Германија има намера од 2016 година да започне да им наплаќа патарина на странците за користење на германските автопати. Маркичките ќе можат да се купат преку интернет или на бензинските пумпи, а возачите на автомобили и мотори регистрирани надвор од Германија ќе плаќаат околу 10 евра за десетдневно возење низ Германија. Наплатата на патарините се воведува со цел да се соберат дополнителни средства за одржување на патната инфраструктура во земјата, изјави германскиот министер за сообраќај Александер Добринт. Тој објаснува дека оваа нова такса за странците е и прашање на праведност, бидејќи „не е фер Германците да плаќаат за возење по автопатите, а странците - не“. Германските државјани во моментов плаќаат патарина преку данокот за возилата. Ако помине законот што го предлага германската Влада, тие исто така ќе мора да имаат маркички за платена патарина, но нив ќе ги добиваат по пошта. Со нацрт-законот се предвидува возачите на автомобили и моторцикли регистрирани надвор од Германија за десетдневно возење по автопатите во оваа земја да плаќаат околу 10 евра, додека за маркичка со важност од два месеци ќе треба да издвојат 20 евра, а годишната ќе чини нешто повеќе од 100 евра. Точната цена на годишната маркичка ќе зависи и од кубикажата на моторот на возилото, староста и емисијата на штетни гасови. Соседните земји, вклучувајќи ги Австрија и Холандија, веќе негодуваат заради ваквиот план на Германија, за кој Добринт тврди дека ќе биде изгласан до крајот на годината. Според пресметките на германската Влада, приходите од патарина за четири години ќе достигнат 2,5 милијарди евра. Планот го поздравија возачите од јужните германски покраини, кои веќе подолго време се лути затоа што плаќаат високи патарини во соседството, пред се во Австрија и Швајцарија, додека странците низ Германија патуваат бесплатно. Од Европската унија веќе предупредија дека донесувањето на закон со кој само странците би плаќале за патарина би претставувало своевидна дискриминација. Се чини дека овој проблем германските власти се обиделе да го решат така што воведуваат маркички и за домашните возачи, кои ќе им стигнуваат на домашна адреса, но цената за нив нема да е иста како за странците.