ГЕРМАНСКИ НОВИНАР ПИШУВА ДЕКА СРБИЈА НЕ Е ИСТА КАКО ПРЕД НЕСРЕЌАТА ВО НОВИ САД: Дали ова ќе го разниша владеењето на Вучиќ?

Добивај вести на Viber

Германски весник анализира дека Србија повеќе не е иста. 

Новинарот Мајкл Мартенс, во текст за германскиот весник „Франкфуртер алгемајне цајтунг“ (ФАЗ) оценува дека српскиот претседател Александар Вучиќ се соочува со најголемиот предизвик од доаѓањето на власт во 2012 година кога неговата СНС почна да ја презема земјата.

Според него, актуелните протести, и покрај разликите во деталите, потсетуваат на народното востание што го собори Слободан Милошевиќ во 2000 година. 

Текстот нѐ потсетува дека протестите почнаа по смртоносното уривање на натстрешницата во Нови Сад и дека првичното тврдење на властите оти натстрешницата не е реновирана се покажа како лага. Оттогаш, пишува Мартенс, 15-минутен молк се одржува во цела Србија.

„Овие политички значајни петнаесет минути сè повеќе се појавуваат како закана за владата, особено што се поврзани со масовните демонстрации, кои почнаа на универзитетите, но сега се зголемија во академските средини“, пишува новинарот. 

Франкфуртскиот весник потсетува дека главното барање на демонстрантите е објавувањето на целосната документација за реконструкцијата на железничката станица во Нови Сад, со која, убедени се, ќе се докаже дека СНС е во центарот на корупцијата.

„Српскиот премиер Милош Вучевиќ, помошник на претседателот Вучиќ, во неделата најави дека барањето ќе биде исполнето. Но, владата го вети тоа и претходно и не го исполни“, пишува Мартенс.

Опишувајќи го контрамитингот во Јагодина, новинарот забележува дека критичарите на власта тврдат оти таму имало само принудени лица, вработени во јавни претпријатија и социјални случаи. 

„Сепак, Вучиќ сè уште е поддржан од дел од општеството. Тоа се луѓе што донекаде се задоволни од економскиот развој и на кои не им пречи, па дури и не уживаат во сѐ посилниот националистички тон на владата – такви луѓе има во Србија, особено кај постарата генерација“, пишува тој. 

Нејасно е, продолжува ФАЗ, дали и како политичката енергија на протестот ќе прерасне во постојана партиски релевантна опозиција. 

„Студентите засега свесно се држат настрана од сите опозициски партии. Се организираат на секој факултет по принципот на основна демократија со завидна дисциплина“, пишува Мартенс.

Се додава и мислењето на многу демонстранти дека во Србија е укинат просторот за партиски ангажман бидејќи СНС ги контролира регулаторното тело за електронски медиуми, изборните комисии, судството. 

„Меѓутоа, ако парламентарната опција како инструмент за политички промени е отфрлена, тогаш останува само народниот револт – и „Вучиќ не покажа само преку контрамитинг дека нема да ја предаде власта без борба“, вели Мартенс.

Тоа потсетува на заканата на Вучиќ за „Кобра“, специјална полициска единица. Ова ги покажува, пишува Мартенс, разликите во однос на Милошевиќ.

Затоа, пишува Мартенс, следните недели во Србија ќе бидат возбудливи. 

„Земјата повеќе не е иста како пред несреќата во Нови Сад. Но, сѐ уште не е одлучено дали протестите трајно ќе го разнишаат системот на владеење на Вучиќ“, анализира медиумот.