Добивај вести на Viber
Со невработеност од само околу 5%, малото место Горажде во Босна и Херцеговина е пример за тоа како економијата може да се постави на здрави нозе. Додека во остатокот од земјата владее општо незадоволство од невработеноста и нискиот животен стандард, Горажде е веројатно единственото место каде што луѓе доаѓаат да живеат, а не си заминуваат.
За време на војната во БиХ, оваа општина претрпела огромни штети, но денес таа претставува економско чудо. Какоја постигна оваа успешна приказна?
Сè започнало така што Горажде своето неискористено земјиште им го понудило на инвеститорите по цена од една конвертибилна марка (0,5 евра), а од нив се барало само да вработат луѓе.
„Направивме сè за да создадеме амбиент и да работиме на олеснувања за сите инвеститори“, вели градоначалникот Мухамед Рамовиќ.
Стив Рајц е Американец кој ја напуштил сончевата Флорида и се преселил да живее во Горажде. Во 1997 година дошол како хуманитарен работник, а општината по војната му дала земјиште за да започне плантажа на малини. Тој oтворил нови работни места и помогнал ова место да напредува. „Да ме прашавте пред пет години ќе ви кажев дека за Горажде нема многу надеж. Многумина заминуваа во Сараево да бараат работа. Денеска тука гледам огромна надеж!“, вели Рајц.
„Оваа компанија е основана во 2005 година и тогаш имавме само осум вработени. Денес стигнавме до дури 432 вработени, а идната година ќе вработиме уште 250 луѓе“, вели Адис Делахмет, претставник на компанија за производство на луксузни автомобилски делови.
Гратчето Горажде се наоѓа на реката Дрина, а денеска е најпожелно место за живот во Босна и Херцеговина. Луѓе од целата земја се доселуваат тука и започнуваат нов живот.