Градинките ќе згрижат 14.555 деца, апел од Шахпаска родителите да не ги носат децата, ако има кој да ги чува

-Aпелирам до семејствата доколку имаат кој да го чува детето во домашни услови, да не го праќаат во градинка. Доколку во една градинка е исполнет капацитетот детето може да биде згрижено во друга градинка каде има слободно место, но само во рамки на иста општина. Инаку, останува на сила владината мерка согласно која вработените да бидат ослободени од работа доколку имаат деца до 10 годишна возраст, истакна Шахпаска на денешната преспконференција.

Поради фактот дека во голем дел од градинките недостига кадар, заради тоа што вработените ги користат мерките на Владата во време на епидемијата, односно дел од нив се дома заради тоа што имаат деца до 10 години, како и веаботени кои имаа хронични заболувања, министерката Шахпаска истакна дека Владата им препорачала на општините да обезбедат или да адаптираат дополнителен соодветен кадар за да се обезбеди непречено функционирање на установите за згрижување деца.

Истовремено, министерот за здравство Венко Филипче детално ги презентираше протоколите според кои ќе работат градинките.

Во групите до 2-годишна возраст треба да бидат згрижени најмногу 6 деца, а од 2 до 6 години групите смеат да згрижат најмногу до 15 деца. Мора да се избегнува контакт меѓу децата од различни групи. Да се врши дезинфекција на просторот на секои два часа. На вработените и на децата задолжително ќе им се мери температура при влез во греадинката. Установите се должни да обезбедат заштитна опрема, и сите вработени задолжително мора да носат маски. Не се дозволува собирање и меѓусебни контакти на вработените во посебни простории. Децата ќе спијат на растојание од еден и пол или два метри на принципот „нозе-глава“. Ќе има постелнина за секое дете обележана со името на детето. Ќе биде забрането користење на играчки кои не се перат и не се дезинфицираат.

-Доколку некое дете појави некакви симптоми за време на престојот во градинката, ќе се изолира во посебна просторија и ќе биде контактиран родител. Секоја градинка ќе има задолжено лице, по можност медицинско за контакт со надлежниот центар за јавно здравје. Родителот доколку забележи симптоми кај детето не треба да го носи во градинка. При секое ново вклучување на детето во градинката, родителот е должен да достави потврда од матичниот педијатар со која ќе докаже дека детето е здраво, истакна министерот Филипче.