Градоначалникот на Крива Паланка од СДСМ му се заблагодари на Мицкоски за понудата за помош

Добивај вести на Viber

Градоначалникот на Крива Паланка од редовите на СДСМ,Сашко Митовски, упати јавна благодарност до сите страни кои помогнаа во гасењето на пожарот што му се закануваше на градот, меѓу кои ина неговите колеги Костадин Костадинов од Струмица, Драган Анастасов од Пробиштип и Митко Јанчев од Кавадарци, како и до градоначалникот на Ќустендил.

„Кога природата се разбеснува, кога огнот ја голта шумата и заканува на директно на домовите… тогаш вистинската сила на еден народ, на еден град, се гледа во тоа кој ќе застане рамо до рамо со тебе.

Длабоко, длабоко се поклонувам пред секоја пожртвувана рака, секое срце што чукаше за својот град. Нема зборови што ќе можат целосно да го опфатат тоа што го сторивте, но ќе се обидам да ви се заблагодарам – како човек, како пријател, како ваш градоначалник“, порача Митовски.

Упати благодарност и до амбасадорот на Бугарија, припадниците на АРМ и МВР, вработените во „Национални шуми“ и општина Крива Паланкам како и на противпожарните екипи на градот., а додаде и дека лично премиерот Христијан Мицкоски му се јавил неколку пати со понуда за помош.

„Исто така целиот тој тежок и драматичен ден, покрај храброста на нашите пожарникари, доброволци и граѓани, едно нешто остави посебен и силен впечаток – тоа што луѓето можеа да нè видат сплотени и обединети пред заедничкиот предизвик. Без поделби, без политички предзнаци – само со една цел: да го заштитиме нашиот град.

Затоа дозволете ми да ја споделам и оваа важна информација – во текот на вчерашниот ден, лично Премиерот Христијан Мицкоски ме контактираше во неколку наврати, нудејќи поддршка и координација. Во целата акција активно се вклучи и директорот на ЦУК, Стојанче Ангелов, кој ја следеше ситуацијата во реално време и обезбеди воздухопловна поддршка. Истовремено, пратениците Љупчо Николовски и Емил Спасовски дадоа свој придонес и изразија подготвеност за соработка, а во текот на денот беа и лично присутни на терен.

Ова не е време за поделби, туку за обединување. И верувам дека граѓаните тоа го препознаваат и го ценат. Само заедно – со чесност, истрајност и емпатија – можеме успешно да се справиме со вакви големи предизвици“, објави градоначалникот на Крива Паланка.