Граѓани плаќале сметки во Тобако, Водовод не ги признава!?

Добивај вести на Viber

Платиле сметка за вода во „Тобако“, но „Водовод“ не им ја признава. Ова е случајот на неколку револтирани граѓани кои се јавија до редакцијата на Фактор жалејќи се дека се принудени двапати да плаќаат иста сметка. На некои им стигнале и решенија за присилна наплата, или опомени пред тужби и покрај тоа што сите сметки за вода им биле уредно подмирени преку наплатните пунктови на „Тобако“ во главниот град, при што на решенијата имале и печат и фискална сметка дека е платено. “Имам примерок од платена сметка за минатиот месец на која има и датум и писмена потврда дека сметката е подмирена, но кога отидов во Водовод ми рекоа дека кај нив нема евиденција дека сум платил. И сега ќе ја исправи ли некој грешката или треба два пати да плаќам една иста сметка“, прашуваат граѓанин од Скопје. Во јавното претпријатие „Водовод и Канализација“ се запознаени со проблемот но, поради службено отсуство на директорот, најавија одговор подоцна во текот на денот. Уште од лани, преку акционерското друштво „Тобако“ е овозможена услугата "плати сметка", која освен што е достапна преку малопродажните мрежи на Тобако, функционира и онлајн. Преку Тобако,  сметки може да се плаќаат на ЕВН, Топлификација, Водовод, УЈП и радиодифузна такса. Граѓаните на кои „Водовод“ не им ја признава уплатата, сега стравуваат дека истото може да им се случи и со останатите сметки. Ниту од „Водовод“ ниту од „Тобако“, засега не објаснуваат каде е точно проблемот. Се претпоставува дека „Тобако“ се уште, кон Јавното претпријатие, не ги исплатил парите на граѓаните што ги должи за наплатените сметки, но тоа би требало да биде проблем за двата правни субјекти, а никако за граѓаните кои ги поседуваат доказите за уплата. Ј.С.Н