Граѓаните болни од ковид нема да плаќаат во приватните клиники?

Добивај вести на Viber

Со прогласувањето на кризната состојба, и приватните клиники ќе треба да примаат болни од ковид на сметка на Фондот за здравство кој што нив ќе им исплаќа сума на пари како што им исплатува на ковид центрите во јавното здравство. Граѓаните нема да плаќаат, објасниле за Канал 5 од Министерството за здавство.

По вчерашниот состанок на министерот за здравство Венко Филипче со сопствениците на приватните клиники, првично се донесе одлука дека ќе помогнат во борбата со корона вирусот. 

Според Законот за управување со кризи, член 33, државата може да употребува и ресурси и на приватни фирми, како и употреба на ресурсите на граѓаните и други правни лица.

„Дневниот надоместок за користење на ресурсите изнесува до 30 отсто од просечната месечна нето плата по работник објавена од ДЗС, во месецот пред давањето на ресурсите, а надоместокот за нивно оштетување или уништување не може да биде помал од пазарната вредност од средството„, се вели во законската одредба. 

Инаку, како што соопшти Министерството за здравство, вкупната бројка на пациенти позитивни и суспектни на корона вирусот кои се лекуваат на инфективните оддели во главниот град и во болниците низ земјава е 1.292 и има околу 120 празни болнички кревети во ковид центрите, тврдат денеска од Министерството за здравство. 

Во тек на денот се прават и исписи на оздравени пациенти со што ќе се ослободат дополнителни легла. Инаку, сите одделенија на клиничките болници располагаат со болнички места до кои има довод на кислород.