Грчките преговарачи и претставници на кредиторите ќе се состанат повторно во сабота

Добивај вести на Viber

Грчки официјални претставници изјавија дека преговарачите ќе се состанат повторно утре со претставниците на кредиторите, „за да најдат допирни точки“ во комплицираните преговори за иднината на спасувачката програма на Грција, пренесоа американските медиуми.

Веста беше потврдена од Брисел од страна на портпаролката на Европската комисија Мина Андреев.

Грција е зависна од транши по две спасувачки програми од 2010 година и брзо и се трошат расположливите средства.

Преговорите со претставниците на нејзините кредитори од другите земји од еврозоната, Меѓународниот монетарен фонд и Европската централна банка не одат добро, а новата лево ориентирана влада во Атина тврди дека нивните барања се премногу строги.

Од своја страна кредиторите инсистираат дека земјата треба да достави доверливи реформи пред да и ја доделат последната транша од 7,2 милијарди евра. Без тој кредит Грција може да заостане со долгот кон ММФ следниот месец и да не биде во можност да исплаќа плати и пензии.

Грчкиот министер за финансии Јанис Варуфакис изјавил во Вашингтон дека неговата земја е цврста во својата намера да остане во еврозоната и владата во Атина дури не ја ни разгледува можноста за излез од неа.

На конференција во Вашингтон, организирана од Институтот „Брукингс“, Варуфакис изјавил дека единствената разумна и проевропска реакција на Грција е да се обиде да постигне фер договор со кредиторите за да го избегне евентуалното излегување од еврозоната.

Варуфакис изјавил дека Европската комисија, Европската централна банка и Меѓународниот монетарен фонд сигурно имаат причина да бараат реформи, но истакна дека досегашниот пристап во кој се наведуваа мерки за жестоко штедење, не даде резултат.

„Се обидовме на овој лесен начин, но тој не дејствува“, изјавил Варуфакис.

Тој исто така изјавил дека Грција не може едноставно да се приспособи кон некаков си постоечки договор за својот долг, што нема да ги реши нејзините економски проблеми.

„Нема да ги прифатиме поставените цели, за кои знаеме дека нашата економија не може да ги исполни“, истакнал Варуфакис.