Грчкото МНР со реакција по изјавата на Мицкоски: Во меѓународните договори нема де факто ситуации

Добивај вести на Viber

Министерството за надворешни работи на Грција упати реакција откако премиерот Христијан Мицкоски во телевизиско гостување рече дека старото уставно име „Македонија“ е вратено во пракса.

- Ги гледам, аха, не можело на Мицкоски да му се верува, тој рече дека ќе го врати името, ќе го поништи (Преспанскиот) договор. Па, еве – го вративме. Па, дури и Венко, кому му беше устата полна со ‘северна’, сега користи Македонија, рече претходно Мицкоски во гостувањето на ТВ Сител.

Во реакцијата се вели Преспанскиот договор е апсолутно обврзувачки за двете страни, како на меѓународно, така и на домашно ниво.

„Во меѓународните договори нема де факто ситуации, нивната примена е униформна и универзална. Напредокот во билатералните односи со Северна Македонија и непреченото продолжување на европскиот пат на соседот бараат строго придржување до договорите и почитување на принципот на добрососедски односи“, се вели во соопштението објавено на интернет страницата на грчкото Министерство за надворешни работи.

Во реакцијата се вели и дека секој обид за фалсификување или менување на содржината на Преспанскиот договор нема да биде прифатен од грчката страна.

„Преспанскиот договор е дел од меѓународното право и неговото почитување е основа за мирен соживот на народите и државите“, додаваат од грчкото МНР.

Премиерот коментирајќи ги критиките од СДСМ дека не може да му се верува, меѓу другото, зашто ветуваше поништување на Преспанскиот договор, а не го оствари, како аргумент дека не е така во интервју за Сител го посочи лидерот на опозицискиот Социјалдемократски сојуз на Македонија (СДСМ), Венко Филипче, кој, како што рече, постојано во јавните настапи користи Македонија.