Гасовод: Америка нема зошто да и се лути на Македонија за „Јужен поток“

Добивај вести на Viber

Откако САД, по информациите дека Јужен поток стартува со работа изрази загриженост околу влијанието на Русија врз земјите од регионот, денеска премиерот Никола Груевски прашан за коментар на изјавата на помошникот државниот секретар на САД Филип Гордон рече дека не очекува негативни појави. „И во моментот од една земја набавуваме гас и нема никаков нов момент во тој правец. Втора работа е што цела Европа главно набавува глас од таа иста земја така што во тој правец не очекувам дека ќе се случат некои негативни појави“ изјави Груевски. Американскиот помошник државен секетар за европски прашања Филип Гордон вчера реагираше на најавата на рускиот гигант Газпром за почеток на изградбата на гасоводот Јужен поток, со кој рускиот гас, преку балканските земји, ќе се пренесува до западноевропскиот пазар. Гордон ги предупреди балканските земји дека не треба да бидат зависни само од еден снабдувач за своите енергетски потреби. - Многу сме јасни дека еден од приоритетите е јужниот коридор и разновидноста во енергетското снабдување на Балканот и средна и источна Европа. Земјите кои за своето енергетско снабдување се зависни од само еден снабдувач, се и политички зависни. Затоа има голем економски, политички и срратегиски интерес да имаме разновидност во енергетското снабдување. Ние не сакаме да бираме и промовираме гасоводи, туку да промовираме разновидност во снабдувањето, изјави Гордон, на прашање како САД ја оценуваат најавата на Газпром дека изградбата на Јужен поток ќе почне наскоро. Инаку, денеска Бугарија и Русија го потпишаа новиот договор за испорака на природен гас помеѓу „Булгаргаз” и „Газпром”.Договорот е склучен на десет години, а испораката на гас ќе се спроведуваат без посредници. По 6 години Бугарија ќе има право да ја намали договорената  количината гас доколку е потребно, а како што појасни министерот за економија Делјан Добрев, тогаш ќе можат да договорат и нови цени за рускиот гас во Бугарија. Бугарија и Русија го фатија последниот рок денеска и го потпишаа конечното инвестициско решение за проектот за гасоводот “Јужен тек”. Македонското учество во „Јужен поток“ се уште не е докрај дефинирано. Владата очекува до крајот на годината Газпром да се определи за некое од понудените технички решенија со кои Македонија ќе добива гас од овј трансевропски гасовод.