ХЕЛИКОПТЕР АКТИВИРАН ВО ДОЈРАН, ЕР ТРАКТОР ВО „САМОКОВ“ - продолжува борбата со пожарите, гори на седум локации во земјава

Добивај вести на Viber

Македонските пожарникари и доброволци и денеска остануваат на терен и се борат со огнените стихии низ земјава. 

Според последните информации од надлежните служи, обидите за гаснење на сите пожари низ земајва не се успешни, и екипите остануваат на терен и продолжуваат со гаснење. 

Хеликоптер од рано утрово учествува во гаснењето на пожарот над селото Николич во околината на Дојран, а еден „ер трактор“ на Дирекцијата за заштита и спасување ќе се вклучи во гаснењето на пожарот над фабриката „Самоков“ во општина Македонски Брод. 

Директорот на Дирекцијата за заштита и спасување Стојанче Ангелов очекува овие два тешки пожари во текот на денот да бидат ставени под целосна контрола. 

- Нашиот фокус денеска ќе биде на гаснење на пожарот во околината на Дојран над селото Николич. Овде има една сосем мала брана која што хеликоптерот ја користи за полнење на вода и дејствува врз овој тежок пожар кој се наоѓа на исклучително стрмен терен. 

Затоа денеска го користиме хеликоптерот кој со кратки налети од три до четири минути брзо и ефикасно делува врз пожарот. Моја претпоставка е дека за неколку часа овој пожар ќе биде ставен под целосна контрола, а верувам и изгаснат - истакнува Ангелов во утринската изјава. 

Ангелов се надева дека денеска под контрола ќе биде ставен и пожарот над фабриката Самоков во Македонски Брод. 

Рано утрово, како што информираше, целосно е изгаснат и пожарот што три дена гореше во атарот на Чучер Сандево.

Од Центаро за управување со кризи пак посочуваат дека во изминатото деноноќие, според инфорамции добиени до 7 часот утрово, имало вкупно 31 пожар, од кои и понатаму се активни 7, локализирани два, а изгаснати 22 пожари на отворено.