ХЕЦ Света Петка на тест: ученикот добар, наскоро ќе нè осветли!

Добивај вести на Viber

Хидроцентралата Света Петка моментално е во тест фаза. ЕЛЕМ се уште ја проверува исправноста и издржливоста на двата генератори на хидроцентралата попозната како Матка 2, дознава Фактор. Оваа електрана иако свечено беше пуштена во употреба на 2 август – празникот Илинден, до крајот на октомври прозвела околу четири гигават/часови струја, што е речиси колку месечното производство на струја на ХЕЦ Света Петка, кога таа ќе почне да работи со полна снага. Нема детаљи зошто толку долго трае тестирањето на турбините на електраната. „Електраната е во фаза на тестирање, за тоа имаме 60 дена, по што следи 24-месечен гарантен период. Тест фазата треба да заврши во текот на следната недела. Во моментот Света Патка работи, вршиме тестирање на агрегатите и целокупната останата опрема и постројки и притоа, произведуваме и испорачуваме електрична енергија за потребите на македонскиот електроенергетски систем. Во моментот работиме на начин што е можно повеќе да го усогласиме режимот на работа на ХЕЦ Козјак и Света Петка за рационално користење на енергијата“, изјави Миле Славевски, директор на хидроцентралата Света Петка. Тој потенцира дека во текот на експлоатацијата на водата од оваа електрана, нема да дозволат преливање на водата во преливната шахта, што всушност значи губење енергија. Инсталираната моќноста на двата генератори на ХЕЦ Света Петка е 36,4 мегавати, коишто годишно треба да произведуваат околу 66 гигават-часови струја доволни за околу 10.000 домаќинства, односно околу 40.000 граѓани. Генераторите треба да преработуваат по 50 кубици вода во секунда. Испуштената вода од хидроцентралата Козјак треба да се преработи во Света Патка и да се добие струја. Ако одредено количество вода пак, се испушти од Света Петка, таа вода ќе ја преработи најниската акумулација Матка 1, електрана која ја оперира ЕВН Македонија. Со изградба на оваа електрана се заокружи проектот на три каскадни акумулации изградени на реката Треска. ХЕЦ Света Петка според првичните најави требаше да стартува со производство пред три години. Доцнењето во градбата ЕЛЕМ ќе го плати со “пенали“ од 10 милиони евра кон главниот изведувач на проектот-словенечки Рико. Во декември минатата година тројца арбитри од Комисијата за разрешување спорови (Dispute Adjudication Board–DAB) одлучија дека и Рико и ЕЛЕМ меѓусебе ќе си платат отштета, но по пребивањето ЕЛЕМ остана должен на Рико. Со ова, првично проектираната инвестиција се искачи на 75 милиони евра.